Tiɣri i uεiwen n Samira: ula d imḍebbren n ( JSK ) fkan-d afus-nsen

Samira Muqrani, d yiwent n tnaddalt seg twilayt n Tizi Wezzu, i d-yeggin talɣuɣa ( championnat ) n umaḍal deg waddal n Kampu.

Taggara-a tegra-d tiɣri i yimḍebbren n tmurt, akked wegdud aqbayli, i wakken ad tt-εiwnen, imi yennulfa-d deg-s waṭṭan n uxenẓir n yidmaren.

Akken i neḥṣa akk, akbayli ur yettaǧǧa gma-s deg teswiεt n ṭṭiq. Γef waya i yuzzlen wid i tt-iḥemmlen, xedmen taferraqt ( cagnotte ), iswi-nsen ad d-jemεen tadrimt s wacu ara tt-εiwnen.

Ula d imḍebbren n terbaεt n yilemẓiyen n leqbayel (JSK), ɣef uqerru-nsen aselway Crif Mellal, rzan ass-a tameddit n wass ɣur-s ar wexxam.

Yuɣ lḥal Samira d tin iḥemmlen nezzeh JSK, ihi tirza-a d tin i as-yehwan nezzeh. Neɣ s unamek-nniḍen, d ayen ara as-d-yefken afud d tebɣest i wakken ad tqabel aṭṭan-is.

Abeεda imi i as-fkan awal belli ad ilin s idis-is, wa ad tt-εiwnen s wayen umu zemren.

Di taggara yewwi-d ad d-nini belli JSK mačči d tarbeεt n waddal kan, lameεna d tigejdit n Tmurt Taqbaylit i aɣ-yesseɣzafen amzur.