Ticci: ad yili usarag ddurt-a akked ubugaṭu Qader Ḥewwali

Tettkemmil tdukkla Asaki n Ticci isaragen i d-tettheyyi taggara-a ɣef yisental iceɣben timetti tazwawt lawan-a, am yidles d tsertit.

Tikkelt-a dɣa, seld Ɛli Sayad amalas (ddurt) iεeddan, d amastan (abugaṭu), ameɣnas n tlufa zeddigen, mass Qader Ḥewwali (Kader Houali), ara yilin d inebgi n temlilit taseklant n tdukkla-a tadelsant.

Asentel ara yettwasqerdcen din yusa-d akka: « Turart s teɣdemt. S wacu ara d-yeglu waya i yizerfan n umdan di Tmurt n Yiqbayliyen?».

Ttiεad-a axatar ad d-yeḍru ass n sed-a sdat-nneɣ, 19 yunyu, ɣef 15:00 n tameddit. Dima, am tannumi, deg Unammas adelsan Idir Ɛacur – Bakaru. Ilit deg usihar!