Tasekla taqbaylit: tberreḥ-d tesbeddit tiregwa ɣef temsizzlin n wungalen, tullisin, d wayen icudden ɣer tasekla n yilemẓiyen

Am yal aseggas, tettheggi-d tesbeddit Takanadit tiregwa, akked tdukkla Tiwizi n Marikan, timsizzlin i wid yettarun s tamaziɣt. Akken i d-berrḥen deg usebter-nsen Facebook, iswi n timsizzelt-a, d asebɣes n tira s tutlayt n tmaziɣt seg yiwet n tama.

Rnu i waya, d afud i ttaken i yimyura-nneɣ, imi ineggura-a ddeqs n wuguren i d-ttmagaren deg wannar, abeεda deg usiẓreg n yidlisen-nsen.

Akken i nuɣ tanummi deg yiseggasen yezrin, yella warraz n Racid Ɛellic n wungal ifazzen, dɣa aseggas-a d taẓrigt-is tis 8. Seg tama-tayeḍ, yella daɣen warraz n Belεid At Ɛli n tullist ifazzen, i d-yewwḍen i teẓrigt-is tis tẓa (9) aseggas-a.

Ayen yeṣṣefraḥen, d tikli n tesbeddit-nsen ɣer sdat, imi deg yiseggasen ineggura, rnan-d timsizzelt n tawes Ɛemruc n wayen icudden i tsekla n yilemẓiyen,d tajmilt i tneggarut-a, i d-yefkan ddeqs i teqbaylit-is. Dɣa aseggas-a, arraz-a atan di teẓrigt-is tis kraḍ (3).

Ma yella d ilindi, rnan-d timsizzelt-nniḍen, nutni akked Yazid Ǧerbib, umu fkan isem ” arraz Furulu ” neɣ timsizzelt n tsekla n tmeddurt yufraren. Taneggarut-a, gan-tt d tajmilt i Mulud At Mεemmer, ihi aseggas-a attan deg teẓrigt-is tis snat (2).

Wid yenwan ad ceyyεen iqeddicen-nsen, yewwi-d fell-asen ad ten-ceyyεen uqbel amenzu n yennayer 2972 (12 janvier 2022).

I wugar n yisallen ad tafem s wadda isallen akk ilaqen di tewlafin. Tanemmirt i tesbeddit tiregwa i yettaken afud i yimyura-nneɣ.