Tabrat n Jean Amrouche i yemma-s (tasuqilt sɣur Murad At Weḥmed)

A yemma εzizen,
D ddwar nekk bɣiɣ ad am-in-aruɣ tabrat ɣezzifen. Mi tedduɣ deg yiberdan n Lpari, ttawḍeɣ ad arguɣ am wakken telliḍ yid-i ɣer yiɣil-iw. Nteddu s ttawil, dacdac, am tmeddit, di teɣzi n ubrid n tmacint, di Radès. Teskerkireḍ iḍarren imeεlal di tcifaḍ-im tiqdimin, tettaraḍ timeḥremt-im icebḥen ɣef yidmaren-im. Belḥara taṭucin-im n teqcict tameẓyant iḥercen xezzrent akkin akka, yerna kra din ur asent-ittruḥu, abeddel n tegnawt, itran i aɣ-d-ittwehhin ; yiwet n talwit meqqren i d-ittalin seg tebḥirin s tfenda ara yemlilen d lehna i d-ittrusun seg yigenni. Yerna ttxemmimeɣ, s leḥzen, d akken tudert ur aɣ-tettak ara s ṭul n wass ad nawi imerriḥen-a, uqbel ad aɣ-yezdel uxxam i yiḍ.
Axxam-nneɣ n Radès, ur t-id-ttadreɣ ara war ma nnuɣneɣ yerna ruɣ-ten-id d iqesḥanen. Ẓẓayit imektiyen-is, imi iččur d tirga anida tugniwin iqquren d tid n lferḥ yeḍwan, ɣas nqedwant d asḥissef ! ugar n tmezwura– ddukklent ta di ta iwakken ad d-xelqent yiwen n umsasi rẓagen yerna ḥlawen am wakken illa uẓawan n terwiḥt-is. Yemma tamecṭuḥt, taḥnint a yemma, yemma taṣebrit yerna iεewlen, yemma inḥafen yerna d tanebɣast ! teẓriḍ dakken mmi-m Jeannot ur d-iffiɣ ara seg yijufar-im, dakken ur iḥellu ara si temẓi-s, yerna akken ibɣu ixdem, anida ibɣu yella, telliḍ yid-s, mačči am wudem ireglen bihfih i d-ittεeddin am tafat n ssiεqa deg wallaɣ-iw ; maca am uzwu ittawi ɣer turin-is, yerna war netta ad immet yettwaxneq ? Amek telliḍ deg wass-a n tefsut icuban anebdu ? Amek i tettqabaleḍ axeddim akk n wexxam ? Akk leεtab iɣelli-d ɣef baba d fell-am. Mbeεd mi tennecrawem azal n xemsin iseggasen, tuklalem cwiṭ n usgunfu, yerna ula d yiwen seg warraw-nwen ur awen-t-yefki.
Meεna a yemma εzizen kemm i d lmuεǧiza-nneɣ iffren. Acku akken bɣun ilin lecɣal isdubuyen rruḥ d tfekka, Illu ifka-yam lemziyya inqedwa : ddaw n ukmac n tfekka-m d ccib-im mazal tarwiḥt-im am tin meẓẓiyen, d yiwen ukufi n tumert am lεinṣer ddaw uẓru i d-itteffɣen seg wallen-im yeεyan. Ma illa kra n uẓawan d kra n tẓuri i aɣ-irefden, Marie Louise d nekk, d kemm kan i aɣ-t-id-ifkan. Tefkiḍ-aɣ-d kullec, tefkiḍ-aɣ-d izen n wakal-nneɣ d wid merra i aɣ-iǧǧan. Meεna ayen txedmeḍ ur εad ikfi, a yemma εzizen.
Di lweqt ideg bedduɣ ad wehhiɣ tamuɣli-w ɣer kra n ccɣel agejdan ara xedmeɣ, ɣur-m i d-ttuɣaleɣ. Ilaq ad taruḍ ccfawat-im, mebla ma textareḍ, akken illa uḥulfu-yim d wayen ad am-d-yettunefken d umatu. Iḥawaǧ tazmert imi d ussis meqqren.
Meεna, xemmem, a yemma εzizen, dakken ur tettaǧǧaḍ ara ad truḥ temẓi-m, d tarmit i tesεiḍ di Tmurt Taqbaylit. Yiwet n temsirt ara d-iffegḍen seg-s d tin ɣlayen. I nekk ad yili d ṭṭabeε uɣris. Ttxil-m a yemma εzizen, efk–as azal i usutur-iw…
Yemma εzizen, s leḥnana ara d-serseɣ tasudent ɣef yiri-m.
Lmuhub

Tasuqilt: M. At Weḥmed.