Amaynut di tira taqbaylit : ” taεeǧǧaǧt ” d ungal amaynut n Walid Sahli

Kra n wussan kan i d-yeqqimen i wakken ad aɣ-d-yeldi useggas-nneɣ tiggura-s. Send-aya, yerza-d ɣur-neɣ useggas amaynut 2022 i d-yewwin yid-s amaynut i tsekla taqbaylit. Wagi, d ungal Mass Walid Sahli i d-yeffɣen ussan-a, i wakken ad yili d wiss 16 seg tazwara n useggas n 2021 ar tura.

Aneggaru-a dɣa, d win umu yefka umaru azwel ” taεeǧǧaǧt “, d win i d-yeffɣen di teẓrigin Busekkin ( Boussekine).

Ad d-nesmekti belli, ur yelli d wagi i d ungal-is amenzu s tutlayt taqbaylit, imi yella yessuffeɣ-d yiwen deg 2019, umu yefka azwel ” tanagit “. S yes-s dɣa, yewwi amḍiq wis sin deg warraz n Muḥemmed Dib.

I yisalli, Mass Walid ilul deg useggas n 1982, deg taddart n Genzet, i d-yezgan deg At Yeεla tawilayt n Ṣtif. Yuɣ lḥal, netta i yellan d aselmad deg uswir amezwaru, ddeqs-aya segmi i yekcem s annar n tira.

Nukni seg tama-nneɣ, nessaram-as afud igerrzen deg umecwar-is.