Covid-19: seld Omicron, yennulfa-d usenfal nniḍen d amaynu

Seld (variant) asenfal Omicron n Covid-19 i yeṭṭfen imalasen-a ineggura amḍiq di tɣamsa tamaḍalant, ufan yimnadiyen asenfal nniḍen i d-ibanen melmi kan di tmurt n Chypre.
Isem i as-yettunefken ar tura d Deltacron, acku ufan deg-s yimazzagen n tdawsa kra n tɣawsiwin i icudden i usenfal n Delta akked tiyeḍ i icudden i win n Omicron.
Yettusemma ad yili uvirus-a yewεer am win n Delta, rnu daɣen iderreε s tazzla am win n Omicron.

Ɣef wawal n yiprufisuren n tebyulujit di tesdawit n Chypre, i yettnadin akka tura deg-s, ufan asenfal-a deg unafag (aéroport). D ayen i d-yessefhamen dakken yella wansi i d-yusa, mačči dinna i d-yennulfa.

Ulama d Deltacron i d isem amezwaru i as-fkan, yezmer ad ibeddel ɣer sdat ma yella ufan-d kra yisalli d amaynut fell-as.
Ɣef waya i ugin ad d-inin yimnadiyen s wudem unsib amek ara yili ɣef umdan skud ur iεedda kra n wakud akken ad asen-d-binent tlufa ugar.