Amaynut di tira: iffeɣ-d wungal amenzu n Neǧmeddin Mwayessi

Ussan-a kan i d-iberreḥ yilemẓi Neǧmeddin Mwayessi, mmi-s n Seṭṭif, s tuffɣa n wungal-is amezwaru deg umecwar-is n tira s uzwel n “Fehmet-iyi ttxil-wat”. Ittwasiẓreg-d udlis-a ɣer Teẓrigin Ccix Muḥend Ulḥusin n umedyaz mucaεen Mbarek Gamar.

Kra n win yebɣan ad iḍil ɣef tḥawact n umaynut-a aseklan, yezmer si tura ad iεeddi ɣer tnedlisin, tugart di Bgayet, Tizi Wezzu d Tubiret.

Ma yella d tazwart, d aselmad Lyes Belεidi i as-tt-yuran. Hatan wayen i d-yusan deg-s:

« Awal amezwaru deg wungal d ajeǧǧig amezwaru di tefsut n tira, ajeǧǧig irennu ɣer gma-s alamma tesmed tefsut » I as-yenna Murad Irnaten.
Ajeǧǧig amezwaru yessers-it Belɛid At ɛli s uḍris-is Lwali n udrar, iḍfer-it-id ujeǧǧig n Racid Ɛellic s udlis-ines Asfel. Seg yimir annar n tira n wungalen yeldi. ddeqs n yimyura i as-yekkren usenfali d usnulfu. Di tizi n wass-a (2021) tamkerḍit n tsekla-nneɣ tessaweḍ azal n 166 n wungalen. Anwa ara as-yinin ad nidir alama nwala ṭṭwabel n reḥbat d tfaskiwin ččurent s yidlisen n tmaziɣt.
Tira n wungalen simal tgemmu, tettnerni ladɣa deg yiseggasen-agi ineggura ddeqs n yimyura i d-yettnulfun, tuget-nsen d ilmeẓẓyen. Ma zik neqqar ungal neɣ sin deg useggas ; mi neɣra yiwen ad nerǧu ddeqs akken ad d-yeffeɣ wayeḍ. Ass ur nelḥiq ara ad nɣer akk ungalen i d-itteffɣen deg yiwen n useggas. D ttebcira n lxir isfiliten ɣer uzekka n tafat.
Mačči ala amḍan n yimeskaren i yettnernin, ula d leḥsab n yimeɣriyen yettnerni. Tamentilt tamezwarut iban uɣen awal i Mɛemmri, ddan deg ubrid uɣur iweṣṣa deg Tebrat i Muḥend Azwaw. Seg tama nniḍen, anerni-agi yekka-d seg uselmed n tutlayt: simmal yettnerni unnar n uselmed n tmaziɣt deg tmurt, simmal yettnerni leḥsab n wid yeɣran tamaziɣt deg yiɣerbazen akked tesdawiyin yettnerni yid-s leḥsab n yimeɣriyen yeqqaren idlisen d wungalen s tmaziɣt.
Ur yettili, ur yelli umyaru ur neɣri. Bɣiɣ ad d-iniɣ ulamek ara tiliḍ d amyaru ma yella ur teɣriḍ ara idlisen n wiyiḍ. Ulamek ara tiliḍ d amyaru ifazzen ma yella terriḍ iman-ik d iḥizi n teɣmert. imyura-amzun d isulas wa yettsenned ɣer wayeḍ, d iqudas n tmussni wa isurrug ɣer wa.
Acuɣer ara iɣer umyaru idlisen n wiyiḍ ? Akken ad iẓer isental yettawrun yakkan akken ur yettɛawad ara i yiɣsan asewwi. Ad iwali aɣanib s wayes ttarun wiyiḍ amar netta ad d-yawi aɣanib amaynut. s tɣuri n yidlisen n wiyiḍ ara iẓer aswir aseklan sani yessaweḍ akken ad iwali amek ara yessers ablaḍ i d-yewwi ɣer ugadir.
Daɣen tissmin ilaq ad ilint, tissmin ibennun, ixeddmen aceqqirew d umḥizwer. Yal wa ad yeɛreḍ ad yif wayeḍ. Ad isidef akk tizemmar-ines n usenfali akked lekyasa taseklant-ines deg usnulfu ad yeḥreṣ allaɣ-is akken ad isugen ad yekcem deg umaḍal n uferriɣ. Akka ara d-banen yimyura ifazzen ara yessalin aswir n tsekla ara yefken leɣri i tira.
MWAYESSI Neǧmeddin, iger-d s annar akken ad d-yesers ajeǧǧig-is ula d netta s wungal-is FEHMET-YI, TTXIL-WAT! Ixleq-d iwudam imsel-iten akken yebɣa netta, yefka-asen tudert. Tuget-nsen d ilmeẓẓyen.
lmeẓẓyen yettargun armi yuɣal ussirem d targit, anda i tt-gren ad tt-afen teqqur. Bɣan tudert neɣ xersum ad d-cleqfen cwiṭ seg-s. S tayri nwan ad yiẓiḍ umɛic meɛna d terzeg i asen-trennu ticki ara d-yeḥder beṭṭu. Ilmeẓẓyen ɣef tumast ur fkin afus, ccetla-nsen bɣan-as gemmu mačči d nnger. Ilmeẓẓyen ttnadin ɣef tlelli ad yekfu lbaṭel meɛna aɛdaw d ajadiw yis-sen yeččur leḥbus.
Tasrit n wungal « Fehmet-iyi, ttxil-wat », yesddukel umeskar snat n tewsatin : seg yixef amenzu armi d wis 4 tasrit d timnennit (écriture compacte), anallas isemmnenni tigawit d yineḍruyen wa deffir wayeḍ, yesddukkel tasrit. Ma deg yixef aneggaru ameskar yeqqleb tasrit, yuɣal ɣer tesrit tamsebḍut, yefrurin (l’écriture fragmentaire). Tasrit ur tkemmel ara akken tella deg tazwara am wakken anallas iseɛraq lǧerra i yimeɣri ilaq alama yefka aḥric s tɣuri ara yegzu ayen yeḍran, din imeɣri ad t-isenṭeḍ ɣer yixfawen iɛeddan.
Mačči ala deg tesrit i d-isebgen umeskar tiḥerci d lekyasa taseklant. Tban-d daɣen deg unallas i d-yettalsen. Seg yixef amenzu armi d wis 4 d yuba (awadem agejdan) i d-yettalsen, meɛna tcellqef-it lmut ur ikemmel ara tasrit. D Itri, ameddakkel n Yuba i ikemlen tasrit mi d-yeffeɣ seg lḥebs. D amaynut i d-yewwi MWAYESSI Neǧmeddin ɣer tsekla-nneɣ imi ulac win i tt-isxedmen tarrayt-agi deg tira-s.
Ansuf s wungal FEHMET-YI, TTXIL-WAT! Ad yessiwel i watmaten-is. Neḍmeɛ ad d-icelqqef kra i teqbaylit, neḍmeɛ daɣen ddeqs ara t-yeɣren. Aḥuddu aḥunu ɣef umyaru i irebban tismin ɣef yidles d tutlayt-is ; yerfed imru yemmar-d lmiddad yeksa deg yiger amellal armi i t-neṭṭef d ungal gar yifassen-nneɣ.
Belɛidi Lyas.
Amyaru, aselmad n tutlayt Tamaziɣt.