21 furar : ass agreɣlan n tutlayt n tyemmat Tutlayt-iw d tilin-iw?

Am uyefki i d-ttḍeɣ seg tebbuct n yemma, am wawal amezwaru i sliɣ seg yiles-is. Di sin yid-sen sεan lbenna n teqbaylit.
Amezwaru, lbenna-s iεred-itt yiles, wis sin yenna-tt-id yiles.

Tutlayt n yemma, mačči d awalen kan i sliɣ refdeɣ-ten s ɣur-s neɣ sɣur wid i iyi-d-yezzin. Tutlayt n tyemmat, mačči d tifyar i lemdeɣ cwiṭ cwiṭ, s usdukkel n wawalen.

Tutlayt n yemma tεedda akkin i waya, tutlayt n tyemmat d tutlayt-iw i ssneɣ s tumert, seld imi lliɣ ur ssineɣ kra, d tutlayt-iw i gziɣ azuḥ azuḥ, uɣaleɣ ssegzayeɣ ula d nekk s yes-s, d agerruj i as-d-ǧǧan yimawlan-is i yemma, neɣ ma nezmer ad d-nini d lamana i as-d-ǧǧan deg yiles-is, i wakken ad tt-ttfeɣ nekk, ad tt-ṣṣiwḍeɣ i mmi d yelli.

Γas ulamma d ass n 21 furar i yettwajjerden d ass agreɣlan n tutlayt n tyemmat, ssfugulen-t lejnas merra.Meεna aseḥbiber d uḥraz n tutlayt, d axeddim n myal ass, d aṣenfar meqqren ideg yettekkay myal yiwen deg-neɣ, xerṣum s wawal “azul”.

Tayemmat taqbaylit dɣa, tekka s ufmiḍi ageεmir deg weḥraz n tutlayt-nneɣ ar ass-a, ama s tmucuha, isefra, timseεraq, inzan neɣ d ayen-nniḍen. Γas ulamma tuget deg-sent ur ɣrint ara tamaziɣt, meεna s yes-sent i mazal tedder tutlayt-nneɣ ar ass-a.

Akken qqaren, agdud war iles, am tfekka war iɣes. Neɣ s unamek-wayeḍ, aɣref iḥeqqren tutlayt-is, leqrar-is d nnger.

Ass-a, tameslayt-nneɣ ɣas llan wid i as-d-inejren abrid, meḥsub ldin-as-d kra n tegurra, meεna mazal ur teṣṣaweḍ ad teṭṭef amkan-is gar tutlayin n umaḍal. Daymi i d-yewwi fell-aɣ nukni s warraw-is, ad as-d-nerr ccan d lhiba i tesεa. Ayagi s uxeddim, d leqdic fell-as.