(Tiwlafin): Kra n tegnatin seg tmesrit n udlis n Ccmini akked tnaga n twacult Xalifi.

Deg umagrad-a, newwi-awen-d kra n tewlafin seg termit timgerrezt i d-nesεedda deg At Weɣlis, Ccmini, di teẓrigt tis ukuẓ n tmesrit n udlis.

D ass ifazen deg ussan, win ideg nerza ɣer yiwet seg tɣiwanin i yeṭṭfen deg lasel, anda i nger tamawt deg webrid-nneɣ ɣer wemkan i yiwet n tɣawsa s wazal-is, d asmuzɣet n tira n yipanuten akked teplakin. Ayagi yeččur ulawen-nneɣ d tumert uqbel ad naweḍ.

Syin akkin imi nelḥeq mugren-aɣ-d yiεeggalen n tdukkla s ucmummeḥ d taḍsa seg yiwet n tama, seg tama-tayeḍ s leḥzen, imi ssarmen lukan di tegnatin nniḍen i d-nemlal.
D tidet ssuren yiḥulfan n tumert d wid n lɣiḍ d usḥissef, numer ayendin imi rran tajmilt i warraw-nneɣ Mhenni d Kaysa, meεna amḍiq n leḥzen d usḥissef ɣef lɣiba-nsen mazal yeṭṭef tasga tageεmirt deg wulawen-nneɣ.

Ulac d acu ur gan yiεeggalen n tdukkla ” Agraw ” akken ad ssifsusen fell-aɣ taswiεt, ad aɣ-sḥulfun s usteεfu, ad aɣ-settun ɣersum i kra n wakud anezgum-nneɣ.

Ssalin ccan-nneɣ akken i gan azal i dderya-nneɣ. Ula d nekkni dɣa nḥulfa iman-nneɣ gar twacult-nneɣ i nella.
Amek uhu, netta zzin-aɣ-d yimura, iselmaden, d yimeɣnasen seg myal tama. Wwḍen armi ttrun yid-neɣ, imi tḥuza-ten tmettant n Mhenni d tukyist am nekkni.

Nesεedda-d taswiεt n lεali, yerna nemyussan d yemdukkal n Mhenni d Kaysa. Γas llan deg-sen wid ur ten-yessinen s wudem, meḥsub akken yeqqar Mhenni deg wawal-is, llan d atmaten-nsen n timmeɣnest.

Di taggara ad nesnemmer imḍebbren d yiεeggalen n tdukkla ” Agraw ” ɣef uqerru-nsen aselway Mass Smaεil Uddan, akked umaray amatu Mass Nadir Uddak ɣef leqder d ccan i aɣ-gan.

Mhenni d Kaysa xedmen ayen yellan fell-asen i ubaɣur n tutlayt-nneɣ, ihi nezmer ad asen-nerr tajmilt myal ass s tɣuri n yidlisen-nsen d usnerni n tektiwin-nsen.

Tanaga n twacult n Mhenni d Kaysa Xalifi.