(Tiwlafin): Ageffur n yiḍelli yesseɣli snat n tqenṭrin, yerna yessexser akk iberdan di Lberǧ Mira (Tasexriwt)

Γas ulamma umren akk medden s lehwa i d-yuwten ussan-a imi tella teqqur lḥala, meεna icercuren n ugeffur yeqwan glan-d s yixessaren deg kra n yiberdan d wanda-nniḍen.

Amedya ɣef temnaḍin i yenṭerren nezzeh seg lgerra i d-yuwten iḍelli, timdint n Lberǧ Mira, taɣiwant n Tsexriwt ( Taskriout), Bgayet.
Taneggarut-a sseɣlin  yiḥumal n waman snat n tqenṭrin, yiwet d tamaynut tettwaxdem melmi kan, tayeḍ d taqburt. Asif uɣeryun i d-iḥemlen yegla s kra n wayen igedlen abrid-is, ula d teqenṭrin ur slikent ara.
D ayen i yeǧǧan dɣa taɣiwant n Tsexriwt d tin n At Smaεel ttwaεezlent ɣef tɣiwant n Yiderginen neɣ ɣef Bgayet s umata. Imi d teqenṭrin-a i yezdin gar-asent.

Imezdaɣ n tɣiwanin n At Smaεel akked tsexriwt yeṭṭef-iten lḥir, imi wa d axeddam, wayeḍ yesεa amuḍin, wis kraḍ yesεa lecɣal-nniḍen. Ihi tifrat i wugur-a ilaq ad d-tili s uɣiwel.

Seg tama-nniḍen, i wid yettεeddayen seg ubrid aɣelnaw uṭṭun 09, yewwi-d fell-asen ad ttḥadaren iman-nsen, neɣ ad εerḍen ur ttεeddayen syin-a lawan-a. Acku grarben-d yeblaḍen deg ubrid deg wadeg ur nebεid nezzeh ɣef wemkan anda i ɣlint tqenṭrin, sdat n ubrid i yettawin i ucercur n Kefrida.