Tukkist seg ungal “asdawan deg urebbi n wussan” n Mhenni Xalifi.

22 mai 202422 mai 2024 Tiziri Ammud n tneḍruyin Nnaqus, Ammud n tullisin Nna Geltum, Ammud n yisefra nnehda n uḥulfu, Aẓeṭṭa n wawalen, Littérature kabyle, Mhenni Khalifi, Mhenni Xalifi, Romans Kabyles, Taqsiḍt Ifker d uwtul, Tasekla taqbaylit, Tukkisin seg ungal, Ungal Asdawan, Ungal Imehbal, Zeddak Mulud tamḥaddit d tmedyezt

D tukkist seg ungal amezwaru n Mass Mhenni Xalifi fell-as talwit. Yeffeɣ-d wungal-a deg aseggas n 2014.

Mi akken nnebḍan yicufar, d tallast ay twala tiṭ n Mindal deg tasint tamezwarut. Yuki-d deg yiwet n texxamt d taberkant, ula d tiɣrabin-is yettxayal-itent d axayel. Imuqel akka anda yella, ur yumin, tessewḥac ddeεwa. Tmuger-it-id ddunit srid s wudem-is ucmit almi yeqqim yuhem yettmessteqsay: Baba Amɣar anda-t? d acu iyi-yeḍran? Anda akka lliy? Ahya tawaɣit-iw..

Yewt akka azal n 5 n tedqiqtin netta yesteqsiw
iman-is yettaf-d tiririt s tuttra tayeḍnin, ad yegzu cwiṭ ulac.

Iruḥ almi i as-yenna d turart berk, d asaru n Jak Buwer neɣ n Prizen Brik ay d-ileḥqen din. Almi dayen i d-yewwi s yisalli s waddad-is, yewfa ur yezmir ad yerwel i tilawt, yessemlaqa iḍuḍan n yifassen-is, yesres-iten yef tmelɣiɣt n uqerruy-is, aneggaru-ya iqreḥ-it mliḥ seg tiyita-nni i yečča. Γas akken, iger-it gar yifadden-is netta yeqqim deg ukarṭun yef tmurt, iserreḥ-asen i yimeṭṭawen, yal imeṭṭi imed am uεeqqa n kawkaw deg tehri.

Segmi d-yemɣur yessen-d, netta iẓri-s yeqqur, ur as-d-ɣlin yimeṭṭawen, ma d ass-a ttwiqqiren-d d acercur weḥd-sen am uṭufan n kraḍ n yiseggasen mi ara as-teccleqfeḍ taɣawsa i iḥemmel. Ula d imeṭṭawen-nni ad as-tiniḍ llan ttraǧun, xaqen ad d-ffɣen. Ṭṭfeggiḍen-d d aman ḥesri, ciṭ n teɛqed ur tt-ksiben.