Mεetqa: Ṭṭfent-d tzeɣwa n udawi ddeqs n wallalen n tesnujjya

Seld aḥric amezwaru i d-yettwaceyyεen imalasen iεeddan, uɣalen ṭṭfen-d yiεeggalen n Ugraw n temsetlelt Mεetqa-Suq Letnin, n Ugezdu n Tizi Uzzu, aḥric wis sin n dduzan ilaqen n udawi i xellsen yiɣriben n Mεetqa d Suq Letnin. Ama d wid n Fransa, Marikan neɣ n Kanada.

Ilmend n waya dɣa, theyya-d taddart ddurt-a, tafuggla i ufraq n dduzan-a i snat n tzeɣwa-nsen n udawi deg yiwet n tegnit n tumert. Yella-d uheggi s tallelt n tdukkla n lxir « Itran » n Tεerqubt. Ula d asnemmer ur ttun yimezdaɣ ad snemmren iminigen-nsen i d-isekden ɣer ɣur-sen d twaculin-nsen.

Ad d-nesmekti dakken s waṭas n yiberdan i mmuggent tbezzarin-a i lfayda n uḥric n tdawsa di Mεetqa. Ama deg yinig, deg internet, neɣ di taddart s timmad-is, yal yiwen yefka-d ayen umi yezmer armi sawḍen i ssuma swayes ara d-aɣen timacinin-nni.

Nnig waya, imi d-yezga ttiεad akked wass agraɣlan n yizerfan n tmeṭṭut, ttunefken kra n yisefkan beddemma i tlawin n temnaḍt-nni.

Ɣef wawal n yiwen n yimheggiyen i usawaḍ n BRTV, ayen akk i d-yemmesɣen d allalen n tesnujjya, d ayen i d-wellhen yimussnawen di taɣult akken ad sqidden tazeqqa-nsen deg wayen umi tesra.