Tasexriwt: Tidukkla n yibabaten n warrac theyya-d tiwizi i ureqqeε n uɣerbaz amenzu

Ilmend n yimuras-a n tefsut, yella-d ureqqeε d ucebbeḥ n uɣerbaz amenzu Musawi Ḥamu n Uneqquc sɣur yiwiziwen d yinaẓuren.

Tella ɣef walmend n tigawt-a tdukkla n yibabaten n warrac n uɣerbaz-a iɣef i d-nettmeslay, i d-yegren tiɣri i uzday n yiɣallen akken ad seggmen kra n lecɣal deg usɣur-nni(établissement) aɣurbiz.

Tidukkla-a tesnemmir kra n win yekkin deg uqeddic-a, ama d ilemẓiyen n temnaḍt, d inaẓuren-nsen, neɣ d wid i d-yefkan dduzan d sselεa.

Ilaq ad d-nini telha maḍi tekti-a i yettwasmersen deg unnar, imi ula si tama n twennaḍt n ubalmud, d ayen ideg ara yaf iman-is, ad t-iḥemmel aɣerbaz-is, ad iɣer ugar.

Ad d-nesmekti dakken send aya, yettwaheyya-d uneḍruy nniḍen s temεiwna akked tdukkla tinmettit n taddart n Rrif akked tdukkla « Oxy-jeunes ». Deg-s gan asarag, suffɣen arrac i ugama, uwin-asen-d aseḥḥar, rnan fkan isefkan i warrac iẓewren di tɣuri.