Amaynut di tsekla: Yeffeɣ-d udlis imezdi “Mouloud Mammeri: intellectuel enchanté, romancier désillusionné”

Yeffeɣ-d ussan-a kan yiwen n udlis imezdi (ucrik) ɣef umussnaw Lmulud At Mɛemmer s uzwel n “Mouloud Mammeri: intellectuel enchanté, romancier désillusionné”.

Kraḍ n yisdawanen, imazzagen di tsekla, i yekkin deg-s. D tizrawin ɣef wazal n Lmulud At Mɛemmer di tmetti d wayen i d-yuwi i umennuɣ, tugart-tugart s tira-s.

Ad naf di tektabt-a, i d-yettwasiẓergen ɣer teẓrigin “Frantz-Fanon” 144 n yisebtar. Yella-as di lmendad-is d useggem-is Muḥemmed Yefseḥ, i yellan d aduktur deg tsekla d tẓuri, d aselmad di tesdawit n Wihran.

Deg-s daɣ, tuwi-d tselmadt di Kanada, Ǧemεa Meεzuzi, taɣuri ɣef wungal “L’opium et le bâton”, i d-yeffɣen deg 1965.

Malika Ɛessam si tama-s, d tamazzagt n tutlayin daɣ d taselmadt di Fransa, tuwi-d tazrawt-is ɣef wudem amatu n Lmulud At Mεemmer d wamek armi i yettusemma d amussnaw neɣ d azamul n umennuɣ ɣef tmagit tamaziɣt.

Yella akka tura udlis-a deg waṭas n tnedlisin.