Tasdawit Ɛebderreḥman Mira: bdan ttbanen-d lexyuḍ n tafat deg tedyant n Tariq Azqaq

Seld asunded n laẓ i yexdem iḍelli uselmad n tesdawit Ɛedberreḥman Mira Tariq Azqaq, buhan buhan-iten wid i d-yesbeggnen abeddad-nsen yid-s.

Ama d isdawanen, iselmaden, neɣ d imdanen-nniḍen, ladɣa deg yiẓedwan inmettiyen.

D ayen i yeǧǧan ahat imḍebber n tesdawit Ɛebderreḥman Mira n Ubudaw, yeqbel ad yeldi yid-s, akked tmeṭṭut-is, taggurt n udiwenni d umciwer.

Ayagi dɣa d tazwara yelhan, ladɣa imi i yeḥbes mmi-s n Ssuq Letnin asunded-is n laẓ i yella iga-t.

Γef leḥsab n yisallen i aɣ-d-yeggḍen, mazal ur frin yiɣeblan-is. Neɣ s unamek-nniḍen, mazal ur as-d-rrin ara i wayen akk i yessutur.

Beṣṣeḥ, yelha win yessaramen ayen yelhan. Rnu i waya, berrḥen-d kra n yimdukkal-is iselmaden d akken ad ilin s idis-is ḥalama yefra uɣbel-a.