(Sɣur Tiɣilt Urtiḥi). Bu tesmert i d-iɣeḍlen rrehba ɣef medden!
17 wagguren seg wasmi i d-tluleḍ, teddiḍ yakan di yal amkan, tbeddeḍ s tezmert n wid i d-iɣeḍlen tillas ɣef lqaεa. Telḥiḍ deg yiberdan am wuffir, dɣa meddden akk rewlen s ixxammen, kemnen, rewlen seg ubrid, ǧǧan-ak imraḥen d yizenqan, fkan-ak kullec! D acu ur ittak ara bnadem i tudert-is?
Tettmeslayeḍ aṭas n tutlayin, tluleḍ-d di Cinwa, wissen ma din i ak-d-tettunefk tudert neɣ tettwaxedmeḍ di Fransa, s yin truḥeḍ ɣer tmurt n ccinwa, din i twalaḍ udem n tafat n ddunit. Tesqedceḍ akk tutlayin d yilsawen, terriḍ-d si tcinwat ɣer tefransist, s yin temmeslayeḍ d ugeldun Philip d tgelliḍt Elezbet, terziḍ ɣer Jhonson, s yin tekkiḍ iberdan d tzenqatin n Lundun. Truḥeḍ, tzeggreḍ i Yilel Atalanti, terziḍ ɣer wakal n Marikan, tɣa seg ufella d akessar ur teǧǧiḍ amḍiq. Terziḍ, ɣef wakken i d-nnan, ɣer tmura iḍerfen di ddunit, truḥeḍ anida ibεed lḥalma a Bu tesmert(couronne) amecṭuḥ.
Terziḍ s ixxamen, akken i d-nnan wid iṣbɣen ddunit s tillas-nsen, dɣa medden umnen, uɣen awal, dɣa qqimmen yal wa deg uxxam-is. Ulac tudert i win ur nettaɣ awal, inna-d ugelliḍ n tillas, medden ilaq ad feεlen.
Meεna ddunit imi s tugdi tettaɣ awal, dɣa tenna Ih i ugeldun n tillas! Tenna-yas ad aɣeɣ awal acku tudert ɣlayet, tudert tesεa azal, ur as-ttserriḥeɣ ara ad d-tenfel akkin i tudert n medden! Nwala acḥal i tekkseḍ a Bu tesmert amecṭuḥ, nwala acḥal i tewwiḍ d terwiḥin, ɣas ma meẓẓiyeḍ, ɣas ma ur k-ttwalint ara wallen, meεna ccɣel-ik iban-d di ddunit.
Tɣeḍleḍ timura, knan igelliden, kanant tgeldiwin, terriḍ medden akk di lḥif ameqran. Mačči d kečč i aɣ-icqan, d wid nni i k-id-islalen i d aɣilif aneggaḍ n talsa. Kečč labud ad d-tidireḍ am watmaten-ik merra, am wid akk iεacen d leqrun aya. Infufad i nessen akka sεan tismar am kečč, meεna ur neqqen ara. Ula d kečč ahat d amelsiw, ur tneqqeḍ ara. D wid i k-isseqdacen di yal aḥric i ineqqen a Bu tesmert. Tewwiḍ deεwessu, deg yimawen n medden merra tuɣaleḍ d ilil, d ssaḥuq, d nnger. Tesliḍ i wayen heddren medden, llan wid icnan fell-ak, llan wid i k-id-issawlen d yir tamacahut…. Limmer kan ẓran d acu yeffren, d acu yellan, ahat ur k-id-ttawin ara am tsakrant taɣeddart; ur ak-semmayen ara taluft am tterka. Tterka, ur as-tessawḍeḍ ara, acku teɣḍel acḥal d yiwen a bu tesmert ay amecṭuḥ. Ayen iffren ikka-d seg wid i k-issxedmen akken ad rren iɣerfan ddaw n tikullya, ddaw n tugdi, dɣa aɣref yugaden, ad yuɣal d win ittḍuεun, d win iteddun akken teddun waman. Agdud ittḍuεun iqebbel rrebg i as-tteqnen ɣes ma rrebg-nni d uzzal aqesḥan. Iqebbel taqlaḍt ɣas ma d taqlaḍt ittawin ɣer lfinga.
D wa i d leḥkem n wid i k-isseqdacen a Bu tesmert, tekkiḍ-d gar ifassen-nsen, tura teṭṭfeḍ s tesmert-ik igduden, iɣerfan, ilsawen, d wid merra i k-yettaggaden.
Gar iɣerfan-a, wid ur neqbil ara aya, d takemmict tamecṭuḥt maḍi. Wigi ur ttwaḥelmmlen ara, acku nnan-d: “ur telliḍ ara d waɣzen akken ad k-nagad, ur telliḍ ara d lweḥc akken ad nerwel sdat-k!” Nehhun imdanen ad swen cwiṭ n llim, dɣa ssem-ik ad iruḥ, ḥwaǧen tafukt n yiṭij, ḥwaǧen azwu ḥlawen d wayen akk isseḥbibren ɣef tudert. Kečč ass-a tuɣaleḍ d amrig gar yir ifassen, d amrig n lbaṭel d tillas tiqesḥanin, dɣa ssamsen-ak ammus-nsen, rran-k d tacmat di lweqt anida d tacmat-nsen i ak-ḍlan. Wali atmaten-ik? Illa win i d-innan kra fell-asen? Ula d nutni neqqen m’ur teqxdimeḍ ara ayen ilaqen, meεna illa melmi tesliḍ rggmen-ten? Illa melmi i tesliḍ deg yimawen kra fell-asen? Ala! D kečč kan iwumi ḍlan tacmat, yerna ur tewεireḍ ara am wakka i d-qqaren wid ibɣan ad gelden s tuggdi. Ufan-ak-d ttawil, ufan-ak-d amek ara k-stheddnen, akken ur tneqqeḍ ara tiriwiḥin. D acu kan, llan kra, rennun zzit i tmes, dɣa ḥmmun-ak ṭṭbel armi tugdi tessefcel amdan, dɣa win ara tḥazed s cwiṭ kan, din ad immet uqbel ad d-terzuḍ s axxam-is.
Rran-k d waɣzen, ur t-telliḍ, semman-ak tteryel, ur tt-tecbiḍ!
Mazal-ik, ɣef wamek i d-nnan, tettedduḍ seg tmurt ɣr tayeḍ… yerna bɣan ad ak-d-inin d akken teslaleḍ-d arraw-ik ur k-icuban ara, teddiḍ akken ad d-tbedddleḍ udem, ma d tanekkit teqqim d nettat kan., terziḍ anida nniḍen tura, iwakken ad d-tuɣaleḍ d ajdid s wudem nniḍen.
Ur bɣin ara lmut-ik wid iṭṭfen ddunit, bɣan ad d-tiliḍ am urekti gar ifassen-nsen akken ad d-ɣeḍlen tillas ɣef ddunit, ahat d nnger i bɣan ad snegren! Tura, bɣan-k ad tt-idireḍ, yerna ad d-gen acraḍ s yis-k, s yin anida tkecmeḍ, ad d-tiliḍ d inebgi war ma tettuneḥsabeḍ d aberrani.
Ih, ad d-tuɣaleḍ am uwexxam!
Deg waya merra, wissen kan ayen i yellan deg ucraḍ-nsen d ayen issidiren neɣ d ayen ineqqen? Tudert-nneɣ i wid i k-isqedcen ur tesεi lmeεna. Ma mmuten 10 neɣ meyya neɣ amelyun, d lfayda-nsen nutni. Ad rebḥen, ad ɣelten lqaεa, am wakken nutni d imeɣlal ur ttmettaten ara!
ɣaḍen-iyi acku ula d nutni ha-ten gar tuccar n ugeldun n tilla i ten-iseddayen mgal tudert, mgal igenni, mgal wayen yuklalen ccan d lεez! Maca, imi qeblen aya, ddnub-nsen i yirawen-nsen!
D aya i zemreɣ ad ak-d-iniɣ, semmeḥ-aɣ kan ma nessuget awal.
Tiɣilt Urtiḥi