Oresegun Olumide, anaẓur yessewhamen n Tmurt n Nijirya!

Oresegun Olumide cuban-t di tmurt-is ɣer yiwen n yimakluyen (peintres) imeqranen i tessen tmetti-nsen tatrart. Tifelwin-is d ayen ifazzen. M’ara txezzreḍ deg-sent, am wakken bɣant ad d-neṭqent, ad d-inint kra. Dɣa m’ara nessers allen-nneɣ fell-asen, am wakken nettwaseḥḥer.

Wa, d Oresegun Olumide, yiwen n unaẓur ilemẓi i d-ikkan si tmurt n Nijirya. Ilul deg useggas n 1983, iɣra Taẓuri icebḥen deg uɣerbaz atiknuluji n Lagos. Si temẓi-s i iḥemmel tamzert (pinceau) akked wayen akk icudden ɣer teklut.

Ilaq ad d-nin d akken anaẓur-a isεa yiwen n uɣanib i yiman-is. Imi issekluy s ṣṣbiɣa n zzit, ittawi-d ayen yettidir yal ass, yerna iḍbeε aɣanib-is s waman, imi aṭas n tfelwin ideg isseqdac aman neɣ i yuɣalen waman d asafar amezwaru akken ad d-yales tidyanin-is n yal ass.

S tisin n yiẓedwan inmettiyen, Oresegun Olumide, issaram ad issiweḍ ayen ixeddem akkin i tlisa n Nijirya. Anaẓur-a ilemẓi ittag timesbaniyin yal tikkelt. Tikwal ttawḍent tfelwin-is ɣer wagim (1000) idularen.

Di tfelwin-is, nezmer ad nwali arrac imecṭaḥ i yeccucufen, neɣ tullas issiriden aceččuy-nsent, iwudam i yesseqdacen aman deg wussan-nsen. Oresegun Olumide, d amaklu i d-yessnulfuyen, issawaḍ ad ixleq kra isteεgiben i as-d-iweḥḥan kra n tedyanin n menwala.