Mbeɛd mi d-ibedd i tefranin n 12 yunyu: Iɛeggalen n Ugraw AMEDYEZ sṭaxxren Saɛdi Qasi
Deg yiwen n wulɣu i d-isuffeɣ ass-a, 05 yunyu, Ugraw n Yimedyazen Yezdin AMEDYEZ, iban-d dakken sṭaxxren aɛeggal aqbur n ugraw-a, Saɛdi Qasi, ɣef ssebba mi i d-ibedd i tefranin tisaḍufanin i yebɣa ad yesɛeddi udabu n Lezzayer ass n 12 yunyu-a i d-itteddun.
Hata wulɣu merra-is i d-isuffeɣ Ugraw-a:
Ulɣu
Xas ulamma yal amdan d ilelli ; xas ulamma yal wa aqeṛṛu-s di tcacit-is ; xas ulamma idles d tsekla d imaḍalen yemxallafen ɣef wiyiḍ, meɛna, seg wakken taluft tedda-tt ɣef yiseɣ, nekkni s yiɛeggalen n Ugraw n Yimedyazen Yezdin, ad d-nberreḥ s waya : lemmer d lebɣi-k ay ul, azday d tdukli gar wat yiwen ubrid aseklan, amdeyzan d wid ara idumen. D acu kan, tewwi-d ad bedden ɣef yimenzayen. Ma htutan wigi, i d-tewwi d tiǧǧin n win i ten-yeǧǧan. Ɣef waya, AMEDYEZ igzem-itt di rray ad yeẓẓeɛ seg-s yal aɛeggal ara yegren iman-is deg yiger n nnger n Teqbaylit. Sya d afella, iɛeggalen n ugraw-agi d wi : Moussa SALMI, Hocine LOUNI, Mohamed AOUCHICHE, Salah LOUNI, Fahem DJOUDI, Salima DALI, Mohand-Akli DJOUAHER, Rabah KADDOUR, Akli AIT BOUSSAD.
Ɣef waya, AMEDYEZ yettberra deg yal win ara yemmeslayen s yisem-is anagar iɛeggalen-a i d-yettwabedren.