Rmila: yettwaldi uɣerbaz n uẓawan sɣur mass Mhenni Hadadu

Ilmend n wass agraɣlan n ugrud, theyya-d tdukkla tadelsant “Ilemẓiyen n Rmila”, di tɣiwant n Sidi Ɛic, aṭas n warmuden (activités) n lεali, gar-asent aldaɣ n uɣerbaz i uselmed n uẓawan. D ayen i ixussen nezzeh deg yak tiɣiwanin n Tmurt n Leqbayel.

Yeḍra-d waya ass n lǧemεa iεeddan, 4 yunyu, anda ḥeḍren aṭas n yimezdaɣ n temnaḍt-nni n Rmila.

Ad d-nesmekti dakken ccɣel-a n ulday n uɣerbaz n uẓawan deg Rmila yella-d s temεiwna n useqqamu n twilayt n Bgayet i asen-yefkan idrimen. Ɣef waya i yeḥḍer uselway n useqqamu-a, mass Mhenni Hadadu, i tfuggla n ulday n uɣerbaz-a.

D ayen yelhan i warrac n Rmila, imi ad afen sya d tasawent amḍiq igerrzen anda ara lemden allalen n uẓawan.