JSK deg ubrid n yitri wis ṭam ( 8 )

Seld amecwar-nsen igerrzen deg teqbuct n Tefriqt, leḥqen yimyuraren n Mellal ɣer weḥric aneggaru n teqbuct n Tkunfidiralit n Tefriqt ( CAF) .

Imdukkal n Bensayeḥ ad uraren ass-a timlilit taneggarut i yetturaǧun ad d-tili ass-a ɣef 20:00 n tmeddit, di Cotonou ( Bénin ).

Ad d-nesmekti belli timlilit-a n umennuɣ ɣef teqbuct, ad d-tili gar Terbaεt n Yilemẓiyen n Leqbayel ( JSK ), akked terbaεt n Raja n Casablanca n Lmerruk.

D tidet, di snat yid-sent sεant amezruy yeɣɣentren deg teqbuct n Tkunfidiralit n Tefriqt, yerna tturarent di snat akken iwata. Meεna d izmawen n Ǧerǧer i yesεan tarmit akked wemḍan n teqbucin ugar.

I yisalli, taqbuct n CAF taneggarut i d-tewwi JSK tella-d deg useggas n 2002. Neɣ ma nezmer ad d-nini, 19 n yiseggasen ur neεriḍ lbenna n teqbuct n Tefriqt.

D ayen i yeǧǧan Imaziɣen, d Iqbayliyen anda ma llan bedden s idis n terbeεt-nneɣ JSK. D asirem n win yesεan nnif d leḥmala i Teqbaylit, ad d-uɣalen yizmawen-nneɣ taqbuct deg yifassen.

Rnu i waya, ma yella tewwi-tt-id, d itri wis ṭam ara d-ternu i umayyu-ines seg yiwet n tama. Seg tama-nniḍen, d itri wis Ṣa (7) deg wid n tefriqt.