Talɣuɣa: JSK terna tarbaεt n WAT ulama s kra n yimuraren d imaynuten

Ɣas ma uraren Yilemẓiyen Inaddalen n Teqbaylit s ddeqs n yimuraren imaynuten, sawḍen rebḥen iḍ iεeddan deg unnar n umenzu n wamber, mgal tarbaεt n Tlemsan, s 3 n yiswan ɣer 2.

Yuɣ lḥal, d asleɣmay Denis Lavagne i ifernen ad isurar ilemẓiyen i ur nurar aṭas aseggas-a, ad yeǧǧ igejdanen ad sgunfun. Ssebba n waya imi tettraǧu-ten-id yiwet n temlilit s wazal-is, n taggara n Teqbuct n Temɣunt (Ligue), ass n 10 di ɣuct-a, mgal tarbaεt n Magra.

Di temlilit n yiḍ iεeddan, d Tizi Buεliya i d-yuwwin iswi amenzu deg uḥric amezwaru. Syin, deg uḥric wis sin, rnan-d yimuraren Tubal d Ɣanem iswi wis sin d wis kraḍ armi iεad ugemmuḍ 3 n yiswan ɣer 0 i terbaεt n Yiqbayliyen.

D acu kan, yella-d seg yimir-nni kra n usalwi si tama n Yizmawen n Ǧerǧer, imi qrib uɣalen-d yinebgawen deg ugemmuḍ acku uwwin-d sin n yiswan i uεessas n JSK. Cwi kan, s ugemmuḍ-a n 3-2 i tekfa temlilit.

Ilaq ad d-nini fkan-d udem yelhan imuraren umi tettunefk tegnit ad uraren. I usmekti, tura tezga-d JSK deg umḍiq wis 5 s 55 tneqqiḍin. Rnu tesεa yiwet n temlilit n uwexxer.