Tadiwennit akked tmarut Naεima Benεezzuz: « Ungal-a amaynut yesεa azal ɣur-i ugar n wayen akk i uriɣ »
Naεima Benεezzuz, yelli-s n Yiɛezzuzen, d lal n sin n wungalen s teqbaylit. D tamarut i yessnen amek ad tezdi iḥulfan-is akked yimeɣriyen-is deg ukaɣeḍ amellal. Yesteqsa-tt uɣmis Isaḥliyen ɣef yiqeddicen-is d tsekla s umata, hata wacu iɣef i d-nuwwi awal.
Isaḥliyen: Sissen-aɣ-d Naɛima Benɛezzuz i yimeɣriyen-nneɣ…
Naεima Benεezzuz: Nekk d tilemẓit i d-yekkren deg taddart n Yiɛezzuzen, taɣiwant n Yimessisen Bgayet. Ur ɣriɣ ara ula yiwen wass deg uɣerbaz, qqimeɣ deg uxxam. Seg temẓi yakan, tamuɣli-inu ɣer tudert temgarad ɣef wiyeḍ. Segmi meẓẓiyeɣ, ssiɣzifeɣ tamuɣli, maca amdan i yessiɣzifen tamuɣli, s leqraya i yettaweḍ ayen i yettmenni.
Amek i teddreḍ tirmit n usuffeɣ n wungal-im amenzu s teqbaylit « Tudert n tmara »?
Texleḍ-iyi gar ukukru d tebɣest. Kukraɣ, imi werǧin ɣriɣ tira n wiyaḍ i wakken ad sεuɣ tikti amek ttarun. Sεiɣ tabɣest, imi heyyaɣ iman-iw i kra i d-itteddun, ama d asenqed ama d asnemmer. Giɣ deg wallaɣ-iw d akken tira-inu ɣas ma ur tufi ara amkan-is deg lawan-a, ad tt-id-yaf lǧil amaynut.
D acu i d tamuɣli-m ɣef tsekla taqbaylit tamirant?
Ur zmireɣ ara ad d-fkeɣ tamuɣli-inu deg wayen i yerzan tasekla taqbaylit, imi ur iyi-tettunefk ara tegnit ad izmireɣ ad ɣreɣ ayen i d-itteffɣen. Maca bɣiɣ kan ad d-iniɣ dakken deg wayen iεeddan, neqqar awi-d kan anwa ara yarun s teqbaylit, awi-d kan d acu ara d-yilin s teqbaylit. Ma d tin n wass-a, nettnadi a wi yufan ayen ara yemmagen s teqbaylit, ad yili zeddig, yufrar ! A wi yufan wid yettarun ad qedcen s wul d yifadden ɣef wayen i xeddmen, ad qedcen fell-as s telqey i wakken ad taẓ teqbaylit ɣer sdat, ad taɣ amkan-is gar tutlayin-nniḍen. Daɣen ssarameɣ limer llan wid ara ibedden ɣef temsalt n usenqed n wayen i d-yetteffɣen, i wakken ur nettemsenqad ara deg way gar-aneɣ.
Awal-im ɣef wungal-im amaynut « Taεekkazt n lejdud » d uzwel-a i as-tferneḍ…
Ungal-a amaynut ” Taεekkazt n lejdud “, d win i uriɣ s lebɣi d ameqqran, d leḥrara. Yesεa azal ɣur-i ugar n wayen akk i uriɣ ar ass-a ; ama d ayen i d-ssuffɣeɣ ama d ayen i mazal. Imi yis-s i d-nniɣ ayen akk i bɣiɣ ad d-iniɣ, i yejmeε wallaɣ-iw seg temẓi. Limer d lebɣi, tilaq seg zik i t-id-nniɣ, mačči almi d ass-ayi.
Ma yella d azwel i as-fkiɣ, mi ara iɣer yimeɣri ungal-a, ad yegzu anamek n uzwel-a.
Amek tettwaliḍ amaḍal n yimeɣriyen n udlis aqbayli?
Ttwaliɣ d akken xussen aṭas yimeɣriyen i yeqqaren adlis n Teqbaylit, cwiṭ-nni i yeqqaren, s nnif kan i ttaɣen idlisen. Llan kra ttaɣen-ten i wakken kan ad sbeɣsen amaru, maca ur ten-qqaren ara ! Amaru ass-a, d tidet yuḥwaǧ asebɣes-nni i wakken ur ifeccel ara, maca ayen i yuḥwaǧ ugar, d akken ad ɣren medden tiktiwin-is, ad yessiweḍ izen-is.
Ma nmeslay ɣef usiẓreg, yaḍra tettmagareḍ-d uguren akken ad d-tsuffɣeḍ adlis?
Deg wayen i yerzan asiẓreg, ur sεiɣ ara ugur. Yal mi ara fkeɣ ungal i yimsiẓreg ad t-iɣer, iqebbel s shala ad t-id-yessuffeɣ.
Aql-ikem d amedya n ddeqs n tlawin imi tsawḍeḍ turiḍ sin n wungalen s tutlayt-im war ma teɣriḍ-tt deg uɣerbaz.
Acu ara tiniḍ i tid d wid i yebran i tutlayt-nsen?
Taqbaylit, win tt-irefden, ad t-terfed ! Win i s-yefkan azal, ad as-texdem azal. Ma d win i tt-yeǧǧan yebra-yas, d nnif-is kan i yerkeḍ. Taqbaylit ass-a, d lixsas i tt-yeǧǧan tuḥwaǧ akk arraw-is ad tt-refden, wama yal yiwen anda i yettaf iman-is, anta tutlayt s wacu i iḥemmel ad yaru. Maca imi tutlayt-nneɣ mazal-itt txus, tuḥwaǧ-aɣ, ur nesεi ara azref ad nqeddec ɣef tutlayin n medden, ad neǧǧ tayla-nneɣ.
D acu i d tamuɣli-m ɣef yimsizwar n tullisin d wungalen i d-yennulfan taggara-a?
Awal zwareɣ-d deg-s ; limer i llan wid i ibedden ɣef uqerru n usenqed aseklan n wungalen d tullisin n teqbaylit, tilaq adlis send ad d-yufrar deg temsizzelt, ad t-id-iḥerrer qbel uɣerbal n yimsenqaden, ad ttuqenεen akk yis-s yimeɣriyen ara t-yeɣren. Maca nekni ass-a, asenqed ulac, imeɣriyen drus ; cwiṭ-nni i yettaɣen idlisen, amur deg-sen ur yeqqar ara ayen i yettaɣ.
Ula d uletma-m Katiya tettaru. Awal d amecṭuḥ fell-as…
D ayen iyi-yesferḥen aṭas, terna-d taḥjurt i teqbaylit, tefka-d tabɣest-is ula i nekk, yis-s i ssawḍeɣ ɣer asirem-iw, ẓran wungalen-iw tafat.
Tanemmirt mi aɣ-d-terriḍ. Ma tesɛiḍ awal n useqqef…
Tanemmirt i kunwi iyi-d-yesteqsan, i ixedmen azal i tira-inu.
Ssarameɣ ad teǧǧuǧeg teqbaylit ad tennerni, ssarameɣ i Yiqbayliyen afud i iǧehden i wakken ad tt-refden.
Temmug tdiwennit sɣur: Azwaw