Taɣuri taseklant i iga mass Ɛebdennur Ḥamiṭuc i wungal “Iḥulfan” n Kaysa Xalifi
Tasleḍt taseklant n wungal “Iḥulfan” i tura temsiwt Kaysa Xalifi, fell-as talwit d rreḥma.
Tamarut : Kaysa Xalifi, d yiwet n tlemẓit i d-yekkren deg Bgayet, taddart n At Smaεel. Tlul-d deg useggas n 1991. Tekcem amaḍal n tira n d wawal n tsusmi send ad tessamed leεmer n 18 n yiseggasen. Telḥa-d deg yimir-nni amecwar n leqdic di ddunit-is. d tamedyazt, d taneɣmast, d tamarut s tutlayt taqbaylit i tezga tḥemmel, tettawi-tt deg wul. Kaysa, temmut deg wass n 25 Yunyu 2018. Talwit i yiɣsan-is d yiman-is.
Azwel n wungal : Iḥulfan.
Aseggas ideg d-yeffeɣ : 2017.
Amḍan n yisebtar : 285.
Amḍan n yiḥricen i yesεa : 39.
Iwudam igejdanen
- Feṭṭa : D tayemmat-nsen.
- Mennad : d baba-tsen.
- Arraw-nsen : Qasi, Lḥamid, Yelda (d taqcict), Busin.
- Mbarek : d argaz n Yelda.
- Lyaqut : d tameṭṭut n Qasi.
- Mennad : d mmi-s n Qasi d Lyaqut.
- Tafsut : d yelli-s n Qasi d Lyaqut.
- Masiba : d tameṭṭut n Lḥamid.
- Ǧeεfer : d gma-s n Lyaqut.
- Ǧuher : d yemma-s n Mbarek.
- Damya : d tanuḍt n Yelda.
- Idetti : d amdakkel n Busin.
- Lunǧa : d tamdakkelt n Yelda.
- Bittu azewwaɣ : d amdakkel n Mennad amecṭuḥ.
Ungal-a yettwaru s tentala n At Smaεel. Nutni, sεan tantala d agla-nsen, awalen i seqdacen akk mačči am wid n teqbaylit. - Agzul
Ungal yebḍa ɣef taluft n Yelda tiεiqert akked Mbarek, argaz-is. llan myeεcaqen, myeḥmalen, tessaweḍ Yelda armi teǧǧa leqraya-ines deg tseddawit bac ad t-taɣ. Asmi d-tewweḍ s axxam, mi iεedda wakud, bdan wuguren akked temɣart-is Ǧuher d teslatin-is i yettgamin ad xeddment ccɣel n uxxam, anagar Damya d menhu d-tezga. Ladɣa imi tezga ur tettarew ara, tebɣa yemma-s n Mbarek ad iεiwed zzwaǧ, tettezzi-yas s lehḍur. Γer taggara, yeqbel ad d-yernu yiwet d takna, d aya i yeǧǧan Yelda ad teffeɣ seg uxxam, ad d-tuɣal ɣer win n twacult-is. tluεa i gma-s Busin, yusa-d yewwi-tt. Maca wid-nniḍen, Qasi d Lḥamid, ur bɣin ara, anagar Busin kan i d-yeqqimen ɣer yiri-s.
Qasi d Lḥamid, segmi reclen, ur ttεawanen ara tawacult-nsen tamezwarut. D Busin kan, imi ixeddem deg uxxam n lluḥ (Menuiserie) ɣur umdakkel-is Idetti, i ten-yettεeyyicen.
Yebɣa Mbarek ad d-yerr tameṭṭut-is maca ur teqbil ara ɣas akken mazal tḥemmel-it, tiswiεin tettmektay-d ayen sεeddayen lwaḥi zik, lameεna dayen tefra-tt di rray ad t-teǧǧ.
Yiwen seg wudmawen igejdanen deg wungal-a d Mennad amecṭuḥ, semman-as ilmend n jeddi-s i yemmuten (baba-s n Yelda). Mennad amecṭuḥ asmi d-ilul, d aciban. D aya i yeǧǧan yemma-s ur t-tḥesseb ara, teɣɣunfa-t imi yella akken. Iɣaḍ-asen i Yelda d tuεrift-is, d aya i t-yettaǧǧan ad yettruḥu s lferḥ ɣer-sen. Baba-s Qasi, teɣleb-it tmeṭṭut-is. Lqecc ur as-d-yettaɣ ara mi ara iruḥ ɣer ssuq (alzuz). Γas ur ixdim kra Mennad amecṭuḥ yerna ad t-tewwet yemma-s, tettεuzzu kan yelli-s Tafsut. Taneggarut-a, ur tebɣi ara imi gma-s yesεedday annect-nni. Mi ara yettili deg uxxam n setti-s Feṭṭa, yetteffeɣ tiswiεin ad yetturar akked umdakkel-is Bittu azewwaɣ. Ttaɣen-as-d lqecc, sefraḥen-t, yettɣamay yid-sen.
D Yelda i yettekkaren ɣer ccɣel n uxxam. Tiswiεin tettruzu-d ɣer-s temdakkelt-is Lunǧa sεeddayent akud.
Feṭṭa, d tin i iḥemlen ad tzeddem isɣaren, tesεa lmal, ifrax, tettawi-yasen-d imɣan, tettḥebbir fell-asen ma lluẓen. Tasa-s tettḥebbir daɣen ɣef warraw-is d warraw n warraw-is ledɣa Mennad. Tḥemmel miḥ Busin am urgaz-is amerḥum acku d amaẓuẓ-is, yerna segmi iḥbes deg leqraya bac ad ibedd ɣef twacult-is, imi tt-ǧǧan watmaten-is ur ten-ttεawanen ara, d netta i yettserrifen ɣef Yelda d yemma-tsen.
Busin, tettawi-t tewnaft ɣer wayen icudden ɣer wansayen, tussna. Iḥemmel ad yeffeɣ ɣer teẓgi ad d-yeṭṭef tiwlafin, izerrew-itent bac ad yefhem.
Tudert-nsen tebna ɣef telwit d leḥnana ɣas akken llan cwiṭ n wuguren am wasmi d-iḥbes Busin axeddim, tebɣa Yelda ad t-tεiwen s uznuzu n ureɣ-ines. Din i tufa tamdakkelt-is Lunǧa, teznez-as ayen tebɣa. - Azɣan ɣef tenfalit d tira
Deg wayen yerzan tinfaliyin, yeqwa deg kra n tseddarin usegzi n tektiwin. Awalen i yettwasmersen, ur ten-negzi ara akk acku ur ten-nessemras ara deg teqbaylit, maca laq ad irekkeẓ yimeɣri bac ad igzu dacu tebɣa tmarut ad d-tini deg kra n tseddarin. D aya i yettaǧǧan taɣuri n wungal-a ad tiwεir cwiṭ. Deg wayen yerzan isental-is, nezmer ad d-nini belli lhan ɣas akken ur ifuk ara. Amedya, nebɣa ad niεlim ma Mbarek d Yelda qqlen lwaḥi ; nebɣa ad negzu mi yuli Busin d yimdukal-s ɣer tqacuct n udrar-nni ma ur t-yuɣ kra imi d-yeɣli ; nebɣa ad nẓer ma teḥla Lyaqut imi terɣa deg wudem-is d tfekka-s … - Kra n wawalen i d-tessegza tmarut
Zzedmer : err (s umata i tiɣri) : yettraju ma ad d-tekker lall-is ad tezzedmer, ur d-tekkir.
Amsi : iciwi : tettban-d tyemmat, taswiεt-a, εinanai am tin iwumi yettwager uzrem deg wamsi-s.
Accerdeq : asmijjeq : heyyant akken yessefk i uccerdeq. War aεeṭṭal, tessuter-as s leḥnana n tnannat ad as-d-yini dacu i t-yuɣen.
Asebgar : acteur : yerna asebgar-is yettwassen nezzeh deg yisura-nni.
Tettmekkik : seg “mekkek” : astehzi deg lḥala, aserxes : …tettmekkik, tettaḍsay fell-asen …
Tagrudant : tallit n ugrud : … ibeddel taɣara n wamek i asen-yesnum ttnefcic d leḥnana di twala n tegrudant-nsen.
Abekkaḍ : leḥram : … ɣas ad yili d ayen yecban iqeddicen n lhul d ubekkaḍ.
Ameslaf : Shampoing : … yesmeεdiz ad asen-d-yettak seg tḥanut-is n dduzan, am tfenda d umeslaf…
Tiganin : lficṭat : …. d iselmaden i ixeddmen tiganin …
Taquffa : tameɣra i txeddem teqcict deg rrcel-is.
Tasnagt : tussna : … yettḥulfu s tmasayt, tekcem-it tesnagt …
Timṭeffrin : tiwuɣa : Ḥala txeddem timṭeffrin …
Iqaqa : aεaned war tifukal : iqaqa-t-id Qasi s uεeyyeḍ ..
Aɣejjar : tagella n tsebḥit : … akken ad asen-d-tesres i netta d yemma-s aɣejjar.
Assurret : filmer : … ibedd fell-as akken ad yemmend assurret swaswa ..
Untim : documentaire : .. tamuɣli-s ɣer wunti i yebɣa ad d-yezdem …
Tileffuɣin : explosifs : tigrawliwin ideg ṭerḍiqent tleffuɣin …
Amnir : yir zzher : icaḍ-as amnir i tt-yeṭṭafaren s layas d lmeḥna.
Tigezzi : lbaḍna : … ad d-yas wass ideg ara teḥsu s tgezzi-nni yettwameḍlen.
Taqremsit : casquette : … ad ixdem taqremsit ɣas iεuff-itt akken ad yili di laman ..
Timiɣert : taɣect n lmut : … ad ak-d-tessiwel tmiɣert !
Yegges : yejreḥ : … neɣ yegges deg walbεeḍ n yidigan.
Aburdu : appétit : … ɣas ahat ur tesεi aburdu.
Tajaxxumt : tadyant : … yebda iḥekku i wayetma-s tajaxxumt …
Arundu : leḥzen : yekka Mbarek imi n tewwurt s wurrif d urundu …
Mennek : beṭṭel (annuler) : teswa ayefki akked yemma-s d gma-s i d-imenken amahil …
Azrir : maquillage : … tafekka-s ama s lqecc neɣ s uxdam n uzrir …
Sseɣẓen : sseḥseb : ur tesseɣẓen d lmektub i yerran deg unyir-is …
Lḥem : aẓ : yettraǧu ad as-d-yesres ḥedd kra n udrim war ma yelḥem …
Tazni : instinct : tebren-d s tezni Yelda ixef-is …
Tamsanut : cuvette : teddem Yelda tamsanut …
Tacriḥt : puce de portable : … ma yegguma mar ahat ad as-d-ibeddel tacriḥt …
Taknart : tapupilt : xseɣ ad kem-d-rreɣ am teknart …
Izuran : lemεun n uεeyyeb : nutni kkaten-ak-d izuran ɣef ssifa-k.
Takemmart : tafermajt : yekcem akken ɣer yiwet n tḥanut, yuɣ-d takemmart.
Imermez : tiẓemmit : aḍemmin s temẓin : … tettawi-d deg yifassen-is takmammuẓt ideg txemmel imermez qrib aseggas aya.
Tiji : ayen yettwaxemlen : nettat mazal teffer ɣur-s kra i ttuɣ txucc-it d tiji.
Arem : εreḍ : armi irem.
Takkert : taqendurt : … tettekkes tisfift i tekkert-is tamzikt …
Atḥa : i tibewt, ɣur Yisaḥliyen : ur : atḥa tḍul maḍi, tluεa-t s lehdu …
Alḥaḥ : iles : yessendeh-d Busin alḥaḥ-is i usefhem.
Sihel : eg ahil : tessihil Yelda ad rnun ad t-awin ɣur umsujji.
Aɣunfu : dégoût : yettas-as-d waddad-a ur yelli d aɣunfu …
Tamenẓaḍt : télécommande : tekker, teddem-d tamenẓaḍt …
Asfaylu : ccmini : ilaq-it-id ḥmu n usfaylu i ceεlen …
Ssuren : xelḍen : ssuren deg-s ugar zzεaf d umnuɣjef …
Tanaslayt : cocotte-minute : … aseqqi d uksum ad wwen deg tnaslayt …
Abra : bouton de vêtement : … ilaq, tazwara, ad as-tessenser abra-ines n tesga ansi tesnuffus.
Tayyint : taccuyt : tura mi yerwa ubazin tayyint i d-yeɣli udrar …
Merẓeggursa : d imɣi ttdwin yes-s arɣay : armi as-d-tusa teḥcict n Merẓggursa …
Isadaren : professonnel : yessefk fell-asen ad t-lebsen d albas am yisadaren …
Tasannuyt : jumelles : … kksen-d timeskenwin d tsennuyt …
Asrag : lweqt, ssaεa ..
Talfi : tilaq : talfi d nettat i ara ak-yinin εiwed rrcel …
Tasedmirt : réacton : ad as-d-tbin tsedmirt n urgaz-is ɣef ustaqsi-nni.
Tamzit : lǧib : … mi twala deg temzit n tbanta, teẓra tettu tilifun …
Tasenεunt : habitude : … ur tezmir ad as-tekkes tasenεunt.
Ijerra : yura, ikteb : … d acu εni armi yi-ijerra annect-a ad iεeddi fell-i ? - Kra n yinzan
Ttuɣ aɣrum d acuraq, yerna d aḥraq.
Tameṭṭut s takna, tekna.
Amerkati rnu-yas, agellil ɣas kkes-as.
Aydi n taddart wala lqayed n tmura.
Ma kečč teqqureḍ, nekk stufaɣ.
Ssuk-itent ɣef yiɣẓer, ad swent, neɣ awer swent.
Ad nesber wala ad nekfer, akka wala kter.
Yenna uɣerda : “Ad ṭṭseɣ s ukmac, ad ččeɣ aḥbac, wala zzhir n yimcac.”
Ayen kkiɣ kkateɣ i uydi, telfi ččureɣ iẓdi.
Ma tḍal-d seg usigna xas rwel i temda.
Ɛebdennur Ḥamiṭuc