Asmekti n Ɛebdella Ḥaman i aɣ-yeǧǧan 3 n yiseggasen aya: Awal n tejmilt n Ǧamal Benɛuf di yennayer 2019

Awal n umaru Ǧamal Benɛuf di temlilit yemmugen d tajmilt i Dda Ɛebdella Ḥaman, ass n 14 Yennayer 2019 deg weɣmis “Lǧemhuriya”- Wihran.

Amɣar azemni n Wihran
Ɣas sliɣ yes-s yakan acku ssneɣ kra seg wid i t-yessnen. Wid t-yessnen qqaren fell-as: d amedyaz, yessen tamaziɣt… Nekk, imiren meẓẓiyeɣ. Ɣas ssneɣ-t akka deg
wudem, maca, amek ara beddeɣ zdat-s, netta yellan d taqacuct, di tegnit n yimiren!
Asmi i ɣ-yezdi wawal i tikkelt tamenzut, yella-d deg useggas 1978, yernu deg
webrid-agi, zdat n weɣmis-a ideg nemlal ass-a. 41 iseggasen yakan, zrin! Ass-nni
nella nekk d yiwen umeɣnas acennay, wagi d mass Musa Belqasmi.
Seg yimir-nni nuɣal nettemlil di kra n tegnatin, ladɣa di tmeɣriwin ideg cennun
inaẓuren-nneɣ. Daɣen llan kra imeddukal i d-yettawin sɣur-s kra n warraten. Di
tallit-nni, win kan iran kra n tmaziɣt yeẓwa (iruḥ) ɣer dda Ɛebdella.
Maca, mi nemyuẓa nekk yid-s, nuɣal nemyussan ugar, ladɣa si 1989 alammi d ass
ideg yunag ɣer wexxam-ines imezgi, deg wass n 9/9/2018.
S tidet kan, seg wakken t-ssneɣ, uɣal ttkukruɣ a d-mmeslayeɣ neɣ a d-aruɣ fell-as
kra! Ɣas netta yezga yesmendag deg-i akken a d-aruɣ kra ɣef yedlisen-ines yakk d
tira-ines s umata. Netta iḥemmel-iyi, yezga yeqqar fell-i: d kečč ay d ul n tmaziɣt
iḥebbken! D kečč ay d amamaḍ (amutur) n tmaziɣt deg Wehran! D kečč ay d aruɣi
n tmaziɣt!..
Cfiɣ daɣan ɣef wasmi d-ffɣent tkarḍiwin n weltaɣ n tiddukla tadelsant Asirem n
Wehran, mi d-yerfed takarḍa m wuṭṭun amenzu yura-d fell-as isem-iw d wumlan-inu, dɣa mi yi-tt-id-yefka, yenna-yi-d: “Takarḍa-ya m wuṭṭun amenzu niqal a tt-ǧǧeɣ i nekk, imi d nekk ay d aselway n tiddukla, maca, smenyafeɣ d kečč i wumi
ara d-iḍer yiseɣ-a umaltaɣ amenzu deg tiddukla Asirem”. Aya merra yessekref-iyi,
yezzi fell-i d tiyersi, yuɣal-iyi d akukru!.. D acu ara d-yini wemdan ɣef ubabat-ines
ay iman?!
Ass ideg yesgunfa i lebda dda Ɛebdella, cubaɣ-t ɣer wasmi yunag Kamal n At
Zerrad ɣer Lalman acku nennum-iten, fell-asen kan ay nettsennid, d nutni kan ay
nesɛa d lmendad. Maca, adeg n dda Ɛebdella ulac wi ara t-ireglen!
Dda Ɛebdella yella-yaɣ d ababat ayiman, i ɣ- yettḥaddan am tarwa-ines; yella-yaɣ d
amɣar azemni, ɣur-s kan i nettuɣal yal mi kersent fell-aɣ, d netta kan i ɣ-
yettwellihen; yella-yaɣ d taqacuct n wedrar imi yes-s kan i nettawi lewhi n webrid
yessufuɣan ɣer liser!
Aṭas n yemdanen i yessnen dda Ɛebdella ameɣnas, dda Ɛebdella amettnaɣ neɣ
agrawli, dda ɛebdella amedyaz neɣ amaru, maca, nekkni nessen ula d lbaḍnat d
lesrar-is. Nessen anecreḥ-ines, nessen imeṭṭawen-is, akken i t-nessen netta s
timmad-is!
Yiwwas ma nedder, a d-nuɣal ɣer wayen yura dda Ɛebdella d umennuɣ-ines.
Isem n dda Ɛebdella Ḥaman kellsen-t yigan-ines deg umezruy, ur yettwasfaḍ, ur
irekku, ur ifennu!
Yelha ma ssuliɣ awal s kra n tefyirin-a d-yeddan di tmezgunt ideg nerra tajmilt i
inaẓuren-nneɣ:
Ttnadiɣ tteḍbir umusnaw
Tiɣwist n tmaziɣt di ccaw
D isulas n timmuzɣa
Merwas di lberǧ n yiṭij
Ɛmer n wewriz d irrijAmɣar azemni n Wihran
Azul i Dda Ɛebdella
…
Ǧamal Benɛuf, Wihran, iḍ n 13 Yennayer 2019.