( Tavidyut). JSK aẓar-inu, d aklip amaynut n Akli D.

D aklip amaynut i d-yessuffeɣ unaẓur Akli D ass-agi. Aneggaru-a, d win umu yefka azwel ” JSK d aẓar-inu “.

Ddeqs n lemεani i d-tewwi yed-s tezlit-a, imi s umata yiwen ad as-yenwu tettmeslay kan ɣef Terbeεt n Yilemẓiyen n Leqbayel (JSK).

Lameεna deg-s yesqerdec ddeqs n yisental. Yuɣ lḥal yemmeslay-d ɣef wazal i tesεa JSK deg tmetti taqbaylit s umata. Γer ɣur-neɣ dɣa, ur telli kan d terbeεt n waddal, beṣṣeḥ d tin i aɣ-yessdukkulen, s yes-s nettat i nbedd, i nemyeεqal d atmaten. Γef waya yenna-d:
” Γas ifsi wudfel ibedd Ǧeǧer ibedd wegdud”

Ihi ɣas ad d-ilin wuguren gar-aneɣ, werǧin ad as-nebru i tegmat, werǧin ad aɣ-yezmir ulbeεḍ.

Seg tama-nniḍen, yessawel-d s tezlit-a i usirem di Tmurt Taqbaylit, ladɣa seld ijajiḥen n tmes i d-iεeddan fell-as.
Deg wawal-is yenna-d: ” azul fell-am yuli wass a tamurt igrawliyen
uzzlen-d arrac tullas ṣṣurra n tezegzuwt i d-sburren “.

Ihi ɣas akka terɣa tmurt-nneɣ, meεna am ass-a ad as-d-tuɣal ccbaḥa-s d tizegzewt-is.

Am akken i d-yemmeslay ɣef nnuba i tetturar JSK deg tudert-nneɣ. Dɣa d nettat i d-yeccekcamen lferḥ d zzhu i wulawen-nneɣ.
Neɣ s unamek-nniḍen, rrbeḥ n terbeεt-nneɣ, d win i d tumert-nneɣ nukni.

Γer taggara, d izen i yebɣa ad yeṣṣiweḍ unaẓur, dakken ɣas llan wid i εerrḍen ad sseɣlin azamul-a, ur zemmren, ur ttizmiren, skud nedukkel. Dayen ara tafem deg tvidyut-a.