Awal n tejmilt i Nur Uld Ɛmara sɣur Mhenna Budinar

Awal n tejmilt n Mhenna Budinar i umeɣnas Nur Uld Ɛmara i aɣ-yeǧǧan ass n 20 ctember 2011:

10 n yiseggasen-aya !

Tezgiḍ teḍsiḍ , udem-ik yezga yennecṛaḥ , anwa ur k-nḥemmel ara , ulac ḥala win yettasmen yis-k , ma yella kečč zeddigeḍ ,amahil-ik zeddig ugar iwellihen-ik s wazal-nsen meqqer . Yal tikkelt mi ara ttmeslayeɣ ssexdameɣ « taqbaylit-nneɣ » nekk yid-k ;tecfiḍ tin-akken nneɣ « spéciale » mačči am tin n wiyiḍ ; yis nettemsefham ,yis nessewham .Tuɣal tserreḥ ula ɣur kra almi d-tneggi seg yimaw-nsen awi-d kan anwa ara d-yessendin ad yacar .
Mraw n yiseggasen aya , zrin am yiwen wass ;20 ctember 2011, 20 ctember 2021 segmi i aɣ-yeǧǧa, umeɣnas, umagday, iṭij n yiselmaden n tmaziɣt . Xas akka tṛuḥeḍ , maca ɣur wid ik-yessnen ,wid ik-iḥemmlen mazal-ik yid-neɣ mazal-ik deg wulawen –nneɣ. Aṭas i yellan gar-aneɣ n wayen yelhan kan , aṭas n wawalen d tenfaliyin i teqqaṛeḍ , ad d-smektiɣ kan yiwet : « Imi ih yella ayɣer ad d-iniɣ ala » , aya teqqareḍ-t imi yal tikkelt mi ara k-id-yeqsed walbaɛḍ laɛmer i d-as-tenniḍ ala akken ẓiḍ yiles-ik iẓiḍit lefɛayel-ik. Xas teǧǧiḍ-aɣ teǧǧiḍ-aɣ-d « maca ur aɣ-teǧǧiḍ ara a Nnuṛ tzedɣeḍ deg telqayt n wul-iw , mi bɣiɣ ad k-waliɣ ad qefleɣ allen-iw ». Aql-ik yid-i i lebda a Nnuṛ.
Ad fell-ak yaɛfu wuzmir , iman-ik di talwit a Nnuṛ, gma n tasa.
La vie a une fin comme une lumière de bougie qui s’éteint, mais dans le cœur de ceux qui t’aime ta lumière ne s’est jamais éteinte.

Mhenna Budinar
Aselway n tdukkla n yiselmaden n tmaziɣt di Tizi Wezzu.
20 ctember 2021