Amaynut di tira taqbaylit: ” Ṭawes Ibelɛiden ” d ungal amaynut n Faḍila Ulebsir

D ungal-nniḍen i d-yernan i temkarḍit n yidlisen i yuran s teqbaylit-nneɣ. Aneggaru-a, d win tura tmarut Faḍila Ulebsir, d win umu tefka azwel ” Ṭawes Ibelɛiden “.

Ad d-nesmekti belli, Faḍila Ulebsir d tin ilulen deg useggas n 1982, di tezmalt, tawilayt n Bgayet. Seg tama-tayeḍ, Massa Faḍila, d taselmadt n Tutlayt d yidles amaziɣ.

Yuɣ lḥal, tawacult Ulebsir d tin yettwassnen deg wannar n tira, ladɣa s umaru Racid Ulebsir.

I yisalli, ungal-a, kra n wussan kan segmi i d-yeffeɣ di teẓrigin n Ccix Muḥend Ulḥusin. D win dɣa i d-yernan i wungalen i yettwarun sɣur tnaggalin tiqbayliyin.

Deg ungal-a, akken i t-id-yessbeyyin wezwel, d tudert n yiwet n tmeṭṭut iḥercen, yesεan nnif ɣef wayla-s, meεna teɣli-d gar yifassen n yir argaz. Tagi d Ṭawes Ibelεiden. Neɣ s unamek-nniḍen, d amedya ɣef ddeqs n tlawin tiqbayliyin tifeḥliyin, i yesεeddan deg tudert-nsent.

Deg ugzul i nezmer ad nɣer di tduli n wungal-a, yedda-d waya : « Acu-t? Yefka tazemmurt! Iwacu? Yuɣal ɣer leqmer ihi! Ad as-icennef Ṛebbi ussan ! Iḍegger-aɣ-d timest ɣer yirebbaw-nneɣ ! I tenna Ṭawes i temɣart-is. Imeṭṭi-s yetturug. Icenfiren-is ttergigin deg zԑaf.

Teqqim tetteqliliḥ, icuf ugaẓuẓ-is deg lfeqɛa. Tettru, tekkat leḥnak-is ɣef wergaz-a tuɣ. Tettruḥu tettuɣal almi i tessuter deg-s temɣart-is ad tessers iman-is, bezzaf tehlek iman-is. Temmeɣ srid ɣer yirkasen-is, telsa-ten, teṭṭef abrid ɣer Tbuda. Teɣzi n ubrid, tettxemmim amek ara d-terr tazemmurt-a yefka wemcum n Ɛmer. Tebɣa ad tesker lgirra iwakken ad tt-id-terr. Teẓẓumlal-d dayen.

Ala tiririt ara d-tuɣal tzemmurt-a. Tetteddu, anagar tafyirt-a i ilesqen deg uqerruy-is ».

Ma ɣef tmarut, tlul Fadila OULEBSIR deg useggas n 1982 deg Tezmalt (Bgayet). D taselmadt deg Tesga d Yidles n Tmaziɣt seg useggas n 2010 ɣer wass-a. Ɣer-s agerdas n Magister deg tsekla tamaziɣt akked d win n uttferres deg Tussniwin Tisensegmanin. Tura, tettheyyi duktura ɣef yinaw asunti deg tira n tmețțut taqbaylit.

Nessaram-as afud igerrzen i Massa Faḍila Ulebsir.