Amaynut di tira taqbaylit: ”Ulac deg wulac”, d ammud n tmedyezt amaynut n Fatima Zituni

Yeffeɣ-d ussan-a, di teẓrigin Ccix Muḥend Ulḥusin, wammud n tmedyezt d amaynut n tmedyazt Fatima Zituni. Adlis-a, d win umu tefka azwel ”Ulac deg wulac” . Deg-s dɣa, tejmeε-d kra n yisefra-s i texdem, ama d wid yeqburen, neɣ d imaynuten.

Fatima, d tin iḥemmlen tamedyezt, d tira, d teqbaylit s umata. Daymi dɣa, i tqeddec fell-as, terna tesseqdac-itt, tesseḥbibir fell-as s zzux daɣen.

Tlul Massa Zituni, deg useggas n 1970, di Buǧima, tawilayt n Tizi Wezzu.

Ad d-nesmekti belli, Fatima tekcem amaḍal n tmedyezt, nettat mazal-itt meẓẓi. Γas tella txeddem isefra, lameεna, teḥrez-iten i nettat kan. Armi d aseggas n 2007, i tebda tettawi-d isefra-ines deg tfaskiwin yemgaraden.

Rnu i waya, deg useggas n 2010, tekcem ɣer wegraw n yimedyazen n wexxam n yidles n Dda Lmulud At Mεemmer. Am akken, i tfareṣ tagnit dinna, texdem ayen-nniḍen, am umezgun.

Ass-a, adlis-is amezwaru ”Ulac deg wulac” , iwala tafat. Γer nukni, d yella deg yella, imi d asεaya-nniḍen i teqbaylit, d agrruj-nniḍen i temkarḍit.

Nessaram-as afud igerrzen deg umecwar-im, d wayeḍ i teẓrigin Ccix Muḥend Ulḥusin.