At Wasif: Timlilit n tmesrit n udlis amaziɣ di teẓrigt-is tis snat

berrḥen-d yiεeggalen n tesqamut n tmesrit n udlis amaziɣ n At Wasif, s udem unṣib, ɣef ttiεad adelsan n tmesrit n udlis, i ttraǧun buhan n yemyura akked yimaẓragen. Ttiεad-a, di teẓrigt-is tis snat, ad yili di teɣzi n 5 n wussan, seg 26 armi d 30 yulyu 2022.

Ad d-nesmekti belli, taẓrigt-a, ad tili d tajmilt i Samir Arkam At Umalek, deg usemmas n usileɣ asadran d ulmad ( CFPA) n At Wasif, di Tizi Wezzu.

Ihi, i kunwi akk yegzan d acu-t wazal n udlis, i wid iḥemmlen tamussni, i wid yessnen azal n tɣuri, d tagi i tagnit i wakken ad tesnerrnim tamussni-nwen. Acku timlilit-a, d ttiεad i umbadal n tektiwin akked tmuɣliwin gar yimussnawen d yemyura-nneɣ.

Rnu i waya, imi xuṣṣent nezzeh temliliyin am tigi, d tagnit-nniḍen, i wakken yal amyaru ad yessissen leqdic-is i wiyaḍ.

I yisalli, ahil n tmesrit-a d amerkenti. Deg-s, ad ilint ddeqs n tesɣimiyin (tables rondes ). Ama gar yemyura i d-yewwin arrazen, neɣ ɣef termit n tira s tmaziɣt ɣur tlawin, ɣef tsuqilt i ymaziɣt , d tiyaḍ. Am akken ara d-ilin yisaragen yemgaraden sɣur yimussnawen, azzenz n yidlisen s ubuddu, d waṭaṣ n wayen-nniḍen.

Ad tafem s wadda, ahil n temlilit-a s lekmal.

Di taggara, nessaram-as afud igerrzen i wid ibedden ɣef ccɣel-a.