Tameddurt n Mhenni Xalifi

Ilul Mhenni Xalifi ass n 08 tuber 1990 deg Uxxam n Ddexla Ɛli, taɣiwant n Ayt Smaεel, aɣir n Bgayet, yemmut ass n 26 mayyu 2023 deg sbiṭar n Xerraṭa.
Mhenni yella d ameɣnas, d amaru, d acennay, d amnadi. Akken i yella d aneɣmas deg tɣamsa yuran, ama s teqbaylit ( tamaziɣt) neɣ s trumit. Yura dɣa deg ddeqs n yiɣmisen am uɣmis n yimaziɣen (la dépêche de Kabylie ) ; La Cité, Tighremt. Am akken i yura daɣen deg ddeqs n tesɣunin.
Rnu i waya, Mhenni yella deg terbeεt n wid yessidigen kra n yidigan d yisefka isenselkamen ɣer teqbaylit. Am uẓeṭṭa anmetti VK, Chess.com d Time.is.
Seg tama tayeḍ, d netta i d-yesnulfan adeg n yisallen ” Isaḥliyen ” i d-yettawin isallen s tutlayt-nneɣ ɣef wayen yerzan akk Tamazɣa.
Mhenni d aqeddac ur nessin εeyyu, yexdem daɣen ddeqs n yisenfaren i ubaɣur n talsa, am win n useḥbiber ɣef twennaṭ, i d-iheyyaa netta akked kra n yimdukkal-is.
Ula d arrac imecṭaḥ ur ten-yettu Mhenni deg leqdic-is, yura ddeqs n tezlatin i nutni s teqbaylit, yerna yebedd tvidyutin-nsent netta s ttimad-is. Ama d tid n ugemmay d yimḍanen, ama d tin n umulli ameggaz ara tafem deg targa n youtube ” Amaḍal n yineglusen “.
Imi yella Mhenni seg wid iḥemmlen, ttabaεen, ẓran azal n Lwennas Meεtub, yesnulfa-d amsizwer uzzig n Dda Lwennas, i d-ssewjaden yal aseggas yisebtar n wungalen Asdawan, Iḥulfan, d Imehbal.

 Ayen yura Mhenni:

•Nnehda uḥulfu, ammud n yisefra, tiẓrigin tira meɣres 2014
•Asdawan, d ungal, ɣef ddemma n umeskar, 2014
•Nna Geltum, ammud n tullisin, tiẓrigin tira 2016
•Imehbal, d ungal, tiẓrigin Ccix Muḥend Ulḥusin 2018
•Aẓeṭṭa n wawalen , d urar tiẓrigin Ccix Muḥend Ulḥusin 2019
•Zeddak Mulud, tamḥaddit d tmedyezt, tiẓrigin Ccix Muḥend Ulḥusin 2020
. •Nnaqus, ammud n tneḍruyin, tiẓrigin Ccix Muḥend Ulḥusin 2021
. •Ifker d uwtul, taqsiḍt, tiẓrigin Ccix Muḥend Ulḥusin 2021.

 Ayen yecna :

Tifrat, d azwel n uḍebsi n ccna, 2015
Adrar n Fad, d azwel n uḍebsi n ccna, 2020

  Abruy seg umecwar n Mhenni Xalifi 

Mhenni segmi i d-ilul yemɣur cwiṭ i d-tban tegzi-s d tḥerci-s, acku segmi i yella meẓẓi netta iḥemmel ad yesteqsi, ad inadi, ad yissin. Ula d takatut-is d tin iǧehden nezzeh. Asmi i yekcem s aɣerbaz amenzu, yella d netta i d amezwaru gar yimendiden-is s tezmilin igerrzen maḍi. Ula d aselmad-is deg uɣerbaz amenzu Mass Dris Gemmac yettεuzzu-t ayendin, axaṭer mačči anagar deg tɣuri-s n yal ass i yeḥrc, wanag ula deg tlufa n ddunit yufa-t d imegzi ageεmir.

Γas ulamma yella Mhenni seg wid iẓewren, ur yessaweḍ ara ad ikemmel amecwar n ulemmud-is, imi iḥbes-it waṭṭan n tmaẓwalin. Yettaxer-d dɣa seg taɣuri-s deg ulemmud alemmas, meεna ayagi ur as-d-iga iεewwiqen deg usnerni n tmussni-s. D anemgal, d aṭṭan-is i yerra d afud n tezmert, d win i t-idemmren ɣer leqdic, d unadi d uxeddim war εeyyu. Ula d taɣuri-s ikemmel-itt deg uxxam, yella d netta i d aselmad n yiman-is.

Mhenni d win iḥemmlen ad yissin, yezga yettnadi, d win yebɣan ad yegzu sya d sya. Niqal segmi i yella meẓẓey netta iḥemmel ad iɣer idlisen, ladɣa wid yuran s tutlayt-is tanyemmat. Ahat asmi i yesεa azal n 8 n yiseggasen i yebda yesmedyiz, acku yella d win yesmuzguten i yinaẓuren imeqqranen. Am Lwennas Meεtub, Zeddak Mulud, Ayt Mengellat, Idir, Ferḥat …..
Ula d timɣarin timeqqranin yezga Mhenni yettemwanas yid-sent, abeεda imi imeslayen-nsent ččuren d tamussni, ula d netta ddeqs i d-igemmer ɣur-sent, ladɣa deg wayen icudden i tgemmi-nneɣ timawit.
Imi yewweḍ azal n 12 n yiseggasen, yebda Mhenni yettaru isefra, timuεay, tuɣac, inzan, timseεraq, tuqennaẓ, tamezgunt d wayen nniḍen, ama d ayen i yettaru netta d asnulfu-s neɣ d ayen d-yettawi sɣur temɣarin d yimɣaren-nneɣ.

Ulac taɣult anda ur yekcim Mhenni, yugem-d seg yal tamda n tmussni, yerna yesmar deg-s ula d netta tayla-s. Segmi ixuleḍ Mhenni izeḍwan inmettiyen, yuɣal yemyussan ukud buhan n yimdukal, sqerdicen akken ddeqs n tektiwin ɣef yidles d tsekla. Imir-n i bdan wiyaḍ ttissinen-t, ẓerren aswir aεlayan i yesεa.

Tuget seg yimdukal-is, deg tazwara, llan ur ẓrin ara belli d ameεḍur, imi werǧin yeḥseb iman-is akken. Mhenni deg wawal-is yeqqar : « ameεḍur d win yesεan allaɣ d ilem, wamma imdanen akken ma llan d imeεḍar, yal yiwen deg wacu ».

Deg 2009, yekcem Mhenni deg unnar n tɣamsa, lawan-nni d Dda Taher Uld Ɛmer i yellan yeṭṭef aɣmis n yimaziɣen. Dinna i yebda amecwar-is n tira deg tɣamsa.
Syin akkin, yuɣal yettaru ula deg yiɣmisen nniḍen ama s teqbaylit neɣ s trumit.

Γas isemmed acḥal-aya ddeqs n yisefra, armi d aseggas n 2014 i d-yessuffeɣ adlis-is amezwaru ” Nnehda Uḥulfu “, d ammud n yisefra i d-yeffɣen ɣer teẓrigin tira.
Deg yiwen useggas 2014, yerna yessuffeɣ-d ungal-is amezwaru ” Asdawan “. ungal-a d win i yehwan nezzeh i yimeɣriyen, ɣas ulamma d tarmit-is tamezwarut deg tira n wungalen, d acu yesken-d yes-s, Mhenni Xalifi, d bab n wawal i yella. Ackudaɣen , kra yellan deg wungal-a igerrez : ama d aɣanib, ama d tabaɣurt, ama d isental, ama d tira.
Ikemmel Mhenni deg umecwar-is n tira, yerna yessuffeɣ-d ammud n tullisin deg 2016 ɣer Teẓrigin Tira, d win i wumi yefka azwel ” Nna Geltum “. Deg lawan-a, yella Mhenni yettaru daɣen deg tɣamsa, yerna yella deg terbaεt n yimsidag anda i yessaweḍ netta akked uletma-s Kaysa gan asideg n chess.com aziraz (mobile).

Deg useggas n 2018, yessuffeɣ-d ungal-is wis sin “Imehbal ” ɣer teẓrigin Ccix Muḥend Ulḥusin. S yes-s i yewwi araz Asya Ǧebbar n wungal yufraren aseggas-nni. Am akken i d-yewwi daɣen ddeqs n warazen nniḍen, ɣef tmedyezt-is, d tullisin-is.

Deg useggas n 2019, yeffeɣ-d udlis-is “Azeṭṭa n wawalen “, d urar, ɣer teẓrigin Ccix Muḥend Ulḥusin. Dinna i d-yessuffeɣ ula d adlis n « Zeddak Mulud, tamḥaddit d tmedyezt ». Deg useggas n 2020, « Nnaqus », d ammud n tneḍruyin. Deg 2021, d « ifker d uwtul » d taqsiḍt i warrac.

Yura Mhenni ayendin d imagraden ama deg uɣmis imaziɣen, Tiɣremt, la cité, ama deg uɣmis Vava inouva, ama deg uɣmis isaḥliyen, d tesɣunin yemgaraden. Ula d aḥric n tmezgunt ur t-yezgil, yura ddeqs n tceqqufin gar-asent yiwet n tceqquft netta d ulatma-s Kaysa, d tin i wumi fkan azwel « tissulya n uɣilif » d tiyaḍ.

Mhenni deg tudert-is yeqdec nnig n tezmert-is i ubaɣur n tutlayt-nneɣ. Ass-a ɣas yeǧǧa-aɣ s tfekka, yezga yedder gar-aneɣ s wayen i aɣ-d-yeǧǧa; isem-is yura s wureɣ zdat wid d tid i iqedcen i usnerni n yidles-nneɣ d tsekla-nneɣ , d tutlayt-nneɣ s umata.
Sgunfu deg talwit a Mhenni, ay agaɛmir.