Tabraṭ n Mhenni Xalifi i d-yeǧǧa i yimeɣnasen.

Anwa deg-neɣ ur nessin Mhenni Xalifi, azamul n tebɣest i yerẓan asaḍuf n tudert i d-yettwaḥettmen fell-as. Γas irkeb-it waṭṭan n tmaẓwalin, igdel fell-as tikli, meεna Mhenni yesnulfa-d ifadden i yiman-is s wacu i yelḥa, s yes-sen i yerza i yal tamurt s tektiwin-is, tigzi-s, tiḥerci-s, akked tmussni-s.
Mhenni nessen-it d amaru, d amedyaz, d acennay, d aneɣmas, d amnadi, lameεna Mhenni amezwaru i d-yewwi fell-aɣ ad nessin d Mhenni ameɣnas.
Mhenni ma yekcem di yal taɣult seg tid i d-nebder yakan, iswi-s amezwaru d timeɣnest, yezga d amsebrid deg ubrid n umennuɣ ɣef yidles, amezruy, tamagit, d tutlayt-nneɣ.

Ula uqbel tamettant-is, ixemmem yeǧǧa-d tabraṭ i yimeɣnasen i t-yecban.
Ha-t-aya d acu i awen-d-yenna :

« Azul ay atmaten n timmeɣnest

Awal-a nwiɣ ad t-azneɣ i wid akk iqeddcen ɣef yidles-nneɣ, yesseḥbibiren ɣef tmagit-nneɣ.

Ass-a, ɣas teṣreɛ-aɣ twenza seg umezruy aqbur, llan seg-neɣ wigad yekkren ad qazmen zzman, ad fersen abrid ad nɛeddi. Ad d-yas kan seg uwellih amezwaru Dda Lmulud deg uqerruy, wama neẓra caḍen wid yezgan ukin rnan ɛellqen tabɣest ɣef yidmaren.

Tura aql-aɣ deg ubrid, yettban-iyi yelha, nettnaɣ d wuguren d yiɛewwiqen s tektiwin-nneɣ, ma d ifassen yak zgan d ilmawen.

Ahat ugur ageɛmir d tasertit i aɣ-d-yekkaten seg tal tama, maca s lebɣi, s tegzi, s lɛehd n nnif d yidammen, aql-aɣ nettfakka asawen… Ur d-yeqqim waṭas. Aya, imi neẓra b acu i aɣ-d-isaḥen zik d wacu i d-nḥella tura, amek ttuɣ tafrit n Uzwaw zik, d Umaziɣ n Tmazɣa s umata, d wamek-itt imira !

Γas nuɣ-itent d tidet deg tegmat seg wacḥal-aya s yisem-nneɣ d agdud, maca imeɣnasen werǧin bran i tegmat. Ama deg idurar  neɣ deg tmura n berra, wala yal yiqwen ixeddem kra i yidles-is.

Cerheɣ nekk seg waya, ferḥeɣ mi nufa agmuḍ n wayen yemmuggen seg yiseggasen-aya, d amedya ; tutlayt tettuseqdac ugar n zik, awal «  azul », s useqdec,  tura yezga deg yilsawen netta yella d aberrani. Yak amaynut n wass-a i yettuɣalen d aqbur n uzekka.

Tarwa-nneɣ daɣen llan ttɣaḍen-iyi mi ɣɣaren tutlayin tiberraniyin, tayla-nnsen uhu. Γas mazal ttalasen sɣur yal yiwen deg-neɣ ad asen-nefru tilla i d-ufan, ad asen-brez abrid ugar.

Skud yettili-d uqeddic igerrzen, ad yettili ubeddel yelhan.

Tura, mi d-tewweḍ nnuba-w ad ṛṛuḥeɣ am yal amsebrid, s talwit n yiman tugart, anda yebɣu iliɣ, ad as-iliɣ d amallal i umeɣnas, ad as-qqareɣ ayyuz seg tafrara n wass.

Afud ihi ɣer sdat, i yiles, i telsawit, i tudert…imi akken yenna dda Lwennas : yal wa ad yemmeslay i yiman-is.

Ma nelmed agemmay n tsusmi, ad nɣer awal n tudert, lbaḍna-s !

Ar tufat ay imeddukal !

Izen-a amecṭuḥ d tanaga ɣef lɛali i aɣ-yezdin. »

Sgunfu di talwit a Mhenni, ad tidireḍ deg ulawen-nneɣ i lebda.