Tukkist seg tullist ” ccfawa n teqcict ” n Kaysa Xalifi

Kaysa Xalifi

Tabraṭ

Tullisin

Tiẓrigin Ccix Muḥend Ulḥusin

=====================================
Kaysa Xalifi d yelli-s n temnaḍt n Ayt Smaεel (Bgayet) , tlul deg useggas 1991
Teǧǧa-aɣ deg wass n 25 yunyu 2018.
D tamarut,  tamedyazt taqbaylit,  d lal n  wammud n yisefra ( kemm deg-i ), d wungal (Iḥulfan) , akked wammud n tullisin i wumi tefka azwel ( Tabrat )

( Tabrat ) d ammud n 7 tullisin :
1- Amek armi teḍra! / 2- I yexdem ugama /
3- Aẓar yeṭṭafar tara / 4- Ccfawa n teqcict
5- Acikaw n laman / 6- Tuɣalin ɣer din /
7- Amcum, ageswaḥ n taddart
=====================================

#Ferneɣ_awen_d_tukkist_seg_tullist_tis_4
#Ccfawa_n_teqcict

             Asmi sliɣ ur qqareɣ ara, ur iḥerrek deg-i wacemma. S unemgal! Umreɣ acku ugadeɣ, am warrac merra, iselmaden d yikeccuḍen-nsen. Lliɣ d tamecṭuḥt aṭas, ur ẓriɣ azal n tɣuri,  neɣ acḥal i d-tettak d abaɣur. D ayen i yi-yeǧǧan ur sḍelmeɣ iman-iw ass-a mi qebleɣ s ucmummeḥ rray n ubabat i ur iyi-yessekcim ɣer uɣerbaz. Nnig waya, ula d netta werǧin sḍelmeɣ-t ɣef wayen yexdem. Imi nniyya-s telha, tezdig am wul-is. D lqella n ttawilat d wayen nniḍen i as-iḥettmen lebɣi-nni. Ur d-qqareɣ diri-t, acku s tmuɣli-w ur yelli akken.

              Tameẓla d tilawt sbeyyinent-d belli ula d ddunit d aɣerbaz. Slid deg-s i tzemreḍ ad tḥefdeḍ kullec. Ulac ass-a amgarad gar yisaduren n lɣaci. Am win yeɣran, am win i ur neɣri. Wa d aneɣmas, yettaru imagraden n yisallen iwakken ad ten-ɣren yimdanen,  wayeḍ d amsuneɣ, iressem tilwiḥin swayes ttcebbiḥen leḥyuḍ. Ta d tanezraft, teḥsa s yizerfan, tettekkes lbaṭṭel, tferren gar useεdi d umcum. Tayeḍ tufrar deg lebni n yideqqi. Meḥsub, tikwal win ur neɣri maḍi, itessen kra n leqdicat ur ten-yessin win yeɣran. —————– Sb 61

===================================
Xas teǧǧa-aɣ, teǧǧa-aɣ-d agerruj-is n yidlisen
Ad tesgunfu di talwit 🙏

Sɣur Nura Tafat