Tadiwennit akked Massa Fourali Yasmina, tamsileɣt n tnemselt n tullist : << timesriyin n udlis d tagnit ad iqerreb umaru ɣur yimeɣri, rnu ɣer-s timesriyin-a ttmuddunt rruḥ i ........ >>
Deg tdiwennit-a nesqerdec kra n wawal nekkni d Massa Furali Yasmina ɣef tmesriyin n udlis, abaɣur-nsent d wayen-nniḍen..
Ayalas : Ansuf yis-m a Massa ɣer At Wassif ! Ad kem-snemmreɣ daɣen ɣef leqdic i txedmeḍ, d yiwellihen i d-tettakeḍ i wid yebɣan ad arun.
Fourali Yasmina : Azul fell-ak a Mass, tanemmirt ɣef tegnit-a i iyi-d-tefkiḍ iwakken ad d-fkeɣ ula d nekk tikti-inu ɣef yineḍruyen yerzan tanemselt n udlis.
Iseggasen iɛeddan llant-d ddeqs n tmesriyin n udlis, deg tuget ttilin deg-sent yimura akked yisaragen. Taggara-ya nettaf tinemsalin !
Ayen yerzan timesriyin-a n udlis, nekk s timmad-iw d tirmit-inu tis snat ideg ara ḥeḍreɣ, ttaɛraḍeɣ ad d-fkeɣ tirmit-inu d wayen ssneɣ ɣef wayen yerzan tira n tullist, n wungal akked tmedyezt. Nekk tidmi-inu ɣef tmesriyin-a n udlis ttwaliɣ belli d ayen igerrzen nezzeh ladɣa imi i tent-xeddmen si taddart ɣer tayeḍ, d tagnit ad iqerreb umaru ɣur yimeɣri, rnu ɣer-s timesriyin-a ttmuddunt rruḥ i tira d tsekla s umata, tin yernan ɣer-s trennu tmussni s yisaragen yemgaraden.
Maca taggara-ya ayen i asent-yernan ugar sser i tmesriyin-a d tinemsalin n tira i d-yettillin : d afud i irennunt i wid yebɣan ad arun, d asnerni n tmussniwin-nsen.
Maca tella yiwet n tamawt, nwala belli mačči aṭas i d-yettruḥun ad ḥeḍren, wid i d-yusan d wid i yellan di teẓrigt iɛeddan, aya d ttbut belli bɣan ad ddun deg umecwar i ran ad nejren, ad ddun deg ubrid n tira. Aya daɣen yuɣal ɣer lebɣi n umdan, ur tezmireḍ ara ad t-ḥerṣeḍ yiwen ɣef wayen ur iḥemmel ara.
D acu i d iswi n tnemselt n tira n tullist ? D acu akk i tesselmadem deg-s ?
Iswi-nneɣ amezwaru nekkni s yimsilɣen, ad nsel i wayen iceɣben wid yettarun axaṭer nwala, bɣan akk ad arun, lebɣi-nsen imal ɣer tira n teqbaylit imi annar ideg d-nemlal d win ideg tettazzal teqbaylit. Tin yernan ɣer-s ad nɛiwen wid yebɣan ad arun, xerṣum ad d-nerr ɣef yisteqsiyen-nsen.
Amek i nezmer ad d-nerr ɣef yisteqsiyen-nsen ?
S yiwellihen i asen-nettak ɣas ulamma akud ur yettsaɛad ara maca nxeddem tazmert-nneɣ.
Ilindi a Massa deg teẓrigt tis snat, tella-d daɣen tnemselt n tira n tullisin. Yuɣ lḥal di taggara tessutrem i yimekkiyen ad d-arun tullisin yerna ṛeggmen-asen yimsuddsen n tmesrit n At Wasif ad d-ffɣent d adlis, sani yewweḍ usenfar-a ?
D tidet yella waya, asenfar yettkemmil, ur yeḥbis ara maca ugur i d-nufa ilindi, mačči aṭas i d-iceggɛen tullisin-nsen anagar kraḍ. Aseggas-a ssarameɣ wid yettikkin deg tnemselt-a ad d-ceggɛen tullisin-nsen, ad nkemmel deg usenfar-a ad d-nessiẓreg tullisin-nsen.
Zik d asiẓreg n yidlisen n tullisin i yeggten, maca tallit n tura d tawsit n wungal i d-iteffɣen s waṭas.
D acu ara tiniḍ a Massa deg waya ?
Fourali Yasmina : Aya d ayen yellan, imi ɣef wakken ttwaliɣ nekk, taqbaylit mazal-itt deg timmeɣnest, ɣef waya imura smenyafen s tuget ssenf n wungal iwakken ad arun akk iḥulfan-nsen, imi deg ungal amaru ur yettwarez ara axaṭer tullist ur ilaq ara ad timɣur.
Γer taggara ad kem-snemmreɣ a Massa ɣef leqdic i txeddmeḍ, d wayen akk i d-tettmudduḍ i yimdanen i yebɣan ad arun. Afud igerrzen.
Tanemmirt i kečč, afud i Uyalas n tmesrit n At Wasif.
Yesteqsa-tt Yugurten Laɛsekri