ADLIS AMAZIƔ DI SILA 2023, TAẒRIGT TIS 26

Ass n 25 di tuber temmug tullya tunṣibt i tmesrit tagraɣlant n udlis di lezzayer tamanaɣt (La foire d’Alger).

Gar waṭas n teẓrigin d waṭas n yimura i d-yusan si yal tama, yettunefk umur i udlis amaziɣ, anda anaf aṭas n teẓrigin d yimura ara yilin.

Deg ass n 26 di tuber 2023, ldint tewwura i uɣref, akken ad iwali, ad yaɣ idlisen i as-yehwan. Ass-a (26-10-2023), 5 n teẓrigin i d-yeglan s udlis amaziɣ: Tiẓirigin TALSA, Tiẓrigin Odyssée, Tiẓirigin Amel/Imal, Aseqqamu unnig n Timmuzɣa akked teẓrigin Enag. Nettraǧu ussan i d-iteddun akken ad d-nnernin wiyaḍ.

Ma yella d timliliyin akked yimura, aṭas daɣen ara yilin. Aseqqamu Unnig n Timmuzɣa iberreḥ-d s wahil n yimeskaren-is ara yilin i usenzi s ubuddu, anda ad ilin si yal tiɣmert n Tmazɣa. Akken daɣen i d-berrḥent teẓrigin-nniḍen s yimeskaren ara yilin, akka am yimeskaren i d-yessufɣen ɣer teẓrigin Talsa, Amel, Imtidad…

Ma d ayen yerzan isaragen d temliliyin yerzan tutlayt-nneɣ, d HCA i yellan i lmendad, aya s uheyyi-nsen n waṭas n temliliyin tidelsanin, tussnanin… tzemrem ad tafem ahil deg usmel n Useqqamu unnig.

Ad d-nesmekti belli, taẓrigt tis 26 n udlis agraɣlan (SILA) teldi tiwwura-s i uɣref ass n 26 tuber, ad tent-temdel ass n 04 wamber 2023.

Ilit di ttiεad!

ITRI, 26-10-2023