Lḥiǧ ɣer Mekka : Tamurt n Ssaεudiya tberreḥ-d dakken 1301 i yemmuten di lḥiǧ
Aɣamac (leḥmu, azɣal). Tuget n wid i yemmuten dinna, d aɣamac aqesḥan i ten-yenɣan, d lḥeǧǧaǧ-nni ur nesεi ara turagt (autorisation).
Tamurt n Ssaεudiya, tberreḥ-d ass-nni n lḥed s tmettant n 1301 lḥeǧǧaǧ i iruḥen ad gen lḥiǧ-nsen deg tmurt-a deg wussan anda tifesniwin n leḥmu ulint nezzeh. « Yettɣiḍ lḥal imi wwḍen 1301 n yimeyyaten, gar-asen 83 % ur sεan ara turagt akken ad gen lḥiǧ-nsen. Wwin-d abrid d aɣezfan deg wussan n uɣamac, ur sεin anda ara ddurin, ur sεin ttawilat ara asen-yesneqsen teqseḥ n yiṭṭij », i d-nnan deg uɣmis n Ssaεudiya.
Imalas i iεeddan, leḥsab i d-yefka udabu asaεudi neɣ wid yettnadin acḥal i yemmuten, nnan-d dakken uṭṭun n tɣetsin (victimes) yewweḍ ɣer 1100. Kra n yidiplumaten n kra n tmura taεrabin nnan-d dakken 658 d Imaṣriyen, gar-asen 630 ur sεin ara turagt tunṣibt i lḥiǧ. Amur ameqqran seg-sen d lḥuman i ten-yenɣan.
Lḥiǧ, yemmug seg 14 almi d 19 yunyu deg utaram n tgelda tasaεudit. Ass n lǧemεa, yiwen seg yimḍebren imeqqranen n tmurt-a, iberreḥ-d i tɣamsa dakken mmuten 577 deg sin n wussan. Imḍebber-a, iεawwed-d ayen i d-yenna udabu-ines : « Adabu-nneɣ, ur yecciḍ ara deg kra maca d wid i yekkren ad ḥuǧǧen ur nḥuder ara iman-nsen, nwan ur asen-tettaεer ara tegnit ». Aneɣlaf asaεudi n tdawsa, Fahd Alǧalaǧil, yenna-d ass-nni n lḥed dakken sferken (gestionner) akken iwata ayen yerzan lḥiǧ n useggas-a.
Yenna-d dakken deg wayen yerzan tadawsa, fkan-d tellelt n 465.000 n lemεawnat, gar-asent 141.000 n lemεawnat i wid ur nesεi ara turagt akken ad gen lḥiǧ ». Adabu, yenna-d dakken 1,8 n yimelyan n lḥeǧǧaǧ i yettekkin aseggas-a ; tuget seg-sen, usan-d seg berra i tmurt.
Igiten-a (rituels), εeddan daɣen aseggas-a ddaw n yiwen n uɣamac d aqesḥan, yewweḍ armi d 51.8 n tfesniwin Celsius deg lǧameε ameqqran n Mekka, tamdint i yesεan akk azal ameqqran deg utaram n tmurt n Saεudiya.
Aɣbalu:
Yerra-t-id ɣer tmaziɣt : Σabdennur Ḥamiṭuc. Tasnawit Tasemsayt n Udekkar.