Awal ɣef tmarut, tamedyazt Sarah Aouchar

Sarah Aouchar, d yiwet n tlemẓit i d-fkan yidurar n tmurt n Leqbayel. D yelli-s n Ccmini, tamnaḍt n At Weɣlis (Bgayet).

At Weɣlis tin i d-yefkan aṭas n yirgazen d tlawin imeɣnasen ama d wid irefden imru,  imedyazen, neɣ d icennayen. Dɣa ulamek ara d-nemmeslay ɣef At Weɣlis, war ma nuder-d Saɛid Ḥanuz, Smaɛil Bellac, Farid Uzadi, Racid Zaruri, d waṭas nniḍen… Yal yiwen s yisem-is, d wazal-is.

Yelli-s n Ccmini, Sarah Aouchar, d tasdawant i mazal tettkemmil alemmud-ines di tesdawit n Ɛebderreḥman Umira n Bgayet, d tin i d-yekkren deg umussu asduklan, ladɣa tiddukla Agraw n Ccmini, i yettwassnen s leqdicat-ines yemgaraden. Rnu ɣer waya, tilemẓit-a d tamedyazt, tetteki deg waṭas n tfaskiwin akked temliliyin n tmedyezt i d-yettilin sya ɣer da di temnaḍin n tmurt. D tin i d-yewwin aṭas n warrazen. Ineggura-ya rnan-as tabɣest i wakken ad tkemmel deg ubrid-a n usefru, d usnulfu.

Tettwanced ɣer waṭas n ttiɛadat idelsanen; usfuggel n Yennayer, asmekti n tefsut n 80 d tedyanin n 2001, akked usmekti n wass agraɣlan n yizerfan n tmeṭṭut,…. Akken daɣ i tekki deg tmesriyin n yidlisen yemgaraden. Sara d tin yettwanceden daɣen ɣer tiliẓriwin, akked yimaṭṭafen,…

Ugar tamedyezt, Sarah Aouchar tettaru iḍrisen  akked tullisin s kraḍ n tutlayin… D tin i d-yettawin ɣef waṭas n yisental. Deg dujember 2023, tilemẓit Sarah tessuffeɣ-d adlis-ines amezwaru, tefka-as azwel : “TILAWT S WUDEM-NNIḌEN”.

Awal ɣef udlis-ines :

Adlis-a d ammud n yiḍrisen, yeffeɣ-d ɣer uxxam n teẓrigin Ccix Muḥend-Ulḥusin, iɣef yella d imḍebber umedyaz Mebarek Gamar. Ddan-d deg-s 07 n yiḍrisen, yal aḍris s tedyant-ines, ha-ten-aya yizwal-nsen :

1- Akkin i tilawt

2- Tiṭ ɣef temẓi

3- Aseggas wis kraḍ

4- Taẓlayt, tutlayt, izerfan

5- Ayalas n usdawan

6- Taselmadt-iw taqbaylit

7- Tiferɣi n twenza

Ugar n waya, Sarah Aouchar, tettaru daɣen s tutlayt n taɛrabt, tessuffeɣ-d adlis tsemma-as : ” محكمة الحياة”, akken daɣ i tekki s tira n yiḍrisen-nniḍen, deg idlisen-nniḍen.

Mmi-s n Yilel