Awal ɣef Ǧilali Lyabes

27 n yiseggasen ɣer deffir ; Ǧilali Lyabes i yellan d aselmad, yettwanɣa sdat n uzadaɣ-ines (immeuble) deg Lqubba (Ldzayer tamanaɣt). Yella imir-nni yetteddu ad iruḥ ɣer tsudut i iseddaw lawan-nni, ttlaεin-as I.N.E.S.G. (Institut National des Etudes de Stratégie Globale).

Ǧilali Lyabes, ilul ass n 1 yennayer 1948 di Sidi Belεebbas. Yeɣra di tesnawit n Assa Σebdelqader (zik, semman-as Laperrine) anda i d-yewwi lbak-ines deg 1967, di taɣult n tsekla. Ikemmel leqraya-ines taεlayant di tesdawit n Ldzayer tamanaɣt anda i d-yewwi turagt (licence) di taɣult n tfelsuft akked tussniwin tinmettiyin (sciences sociales) ; yewwi-d doctorat n uḥric wis 3 (3ème cycle) akked doctorat n uwanek di taɣult n tsekla tussniwin tinmettiyin.

Yella d anemhal n tegmiwin, yuɣal d anemhal n wammas n tegmiwin d tezrawin deg taɣult n économie appliquée au développement (CREAD). Di lawan-nni, Ǧilali Lyabes, yurga yiwet n targit. Iwala Ldzayer uzzlen deg-s yidammen, yekker rrsas deg-s, iwala iman-is daɣen d aneɣlaf, umbaεed ad t-nɣen. « Timḍelt-iw, ad tili am tin n Bumedyen maca ur tettili ara meqqret am tin. Ma yella ayen i urgaɣ ad yeḍru, yewwi-d fell-i ad fakkeɣ ayen i bdiɣ », i asen-yenna i yimidiwen-is …

Ǧilali Lyabes, yuɣal umbaεed d aselmad n tsenmettit (sociologie) di tesdawit n Ldzayer tamanaɣt. Ass n 17 yunyu 1991, sbedden-t d aneɣlaf n tesdawiyin ddaw n unabaḍ n Γzali. Kra n waguren akken, yuɣal di leεḍil d aneɣlaf n usedwel asmi iṭaxxer Muḥemmed Benmuḥemmed.

Deg 1992, Ǧilali Lyabes, yella ɣef uqerruy n tesmilt n Ldzayer 2005 (Commission Algérie 2005) i isbedd ass n 15 furar uselway n tseqqimt taεlayant n uwanek (Haut Comité d’Etat) ; tasmilt-a, tlettha deg uxemmem ɣef umhaz n tmetti tadzayrit i 10 n yiseggasen i d-yetteddun yewwet amek ara asen-d-yefk amedya ɣef tmetti tadzayrit amek ara teddu ɣer sdat akken ad tecbu leǧnas i yuẓan ɣer sdat.

Ǧilali Lyabes, d aggag i yesεan tamuɣli d talqayant ɣer sdat ; annar-is, d tasenmettit tamgurant (sociologie industrielle). Di tuber 1992, sbedden-t d anemhal n tsudut taɣelnawt n tezriwin n tsudest tamatut (Institut National d’Etudes de Stratégie Globale) (I.N.E.S.G).

Ass n 16 meɣres 1993, Ǧilali Lyabes, yettwanɣa s rrsas deg uɣaram (cité) n Ben Σumar deg Lqubba, yella yetteddu ad iruḥ ɣer tsudut-nni. D ayen i yurga akken i yeḍran …

Σabdennur Ḥamituc.

Tasnawit n Σebdelqader Busaεa. Adekkar.

Ass n 29/ 03/ 2025.

Isallen i ufiɣ da, kkseɣ-ten-id seg usmel n : https://babzman.com/