Awal ɣef umsujji amaru Lεadi Flisi

32 n yiseggasen aya segmi yettwanɣa Lεadi Flisi seg ufus n sin n yimdanen deg wanda i ixeddem akken, deg uxxam-is anda i ilul, deg « La Casbah » n Ldzayer tamanaɣt. Wid i t-yessnen akk, qqaren-d dakken d amdan lεali.

Lεadi Flisi, yella d ṭṭbib n yigerdan deg La Casbah anda ilul yakan netta. Ttlaεin-as « ṭṭbib n yimeɣban » (pédiatre) acku ma yeẓra yiwen ur yesεi ara ur t-yettaǧǧa ara ad ixelles neɣ yessutur-asen deg wadeg n waya ad as-d-awin lemḥaǧeb neɣ lmeqruṭ akken ur ttsetḥin ara.

Lεadi Flisi, yella d amedyaz, d amaru, daɣen d ameɣnas seg yidammen-is. Yettwali iman-is teεna-t temsalt n umezruy, tasertit tadelsant n Ldzayer yerna yeggar iman-is anda yella umennuɣ. Di tazwara n yiseggasen n 1990, asmi bdan ttnuɣen aggagen (intellectuels) di Ldzayer, wessan-t ad yerwel seg tmurt maca yugi, yeqqar-asen dakken ad yeqqim di La Casbah anda i ilul, dinna i yettḥulfu iman-is di laman wala anda-nniḍen. Ass n 17 meɣres 1993, llan ttεassan-t ad iruḥ ɣer temḍelt n Ǧilali Lyabes i nɣan iḍelli-nni maca Lεadi Flisi ur yettruḥu ara ɣer tjebbant-nni acku nɣan-t ula d netta yiεdawen n tudert deg wadeg-nni anda ixeddem, di texxamt-nni anda ilul 56 n yiseggasen aya ɣer deffir. Dayen, ur yettεawad ara ad yessuji wid ur nesεi ara, ur yettaru, ur yettmeɣnis. Yeǧǧa-yasen-d yiwen n yilem anect ila-t i wid i t-yessnen.

Ilul ass n 12 wamber 1937 di La Casbah n Ldzayer tamanaɣt ; Lεadi Flisi, yeɣra leqraya taεlayant deg uɣiwen (faculté) n Ldzayer tamanaɣt maca yeḥbes acku iger iman-is di tmeɣnest. Teḥbes-is la D.S.T. (La direction de la surveillance du territoire) deg 1956, gren-t ɣer tkurmut (prison), yewwet-d aseggas dinna di Barberousse.

Deg 1962, yella d aselway n teymunt taslekmant (comité exécutif) n U.G.E.M.A (Union générale des étudiants musulmans algériens), yerna cweyya iṭaxxer-d syin-a. Yuɣal ɣer leqraya-ines di taɣult n tujjya iwakken ad yuɣal d amsuji n yigerdan, yeldi amaris-is (cabinet) di La Casbah, deg uxxam-nsen.

Asmi yella di tkurmut i yebda tira n tmedyazt ; isental-ines, ttezzin ɣef ttraḍ d tayri. Idlisen-is imezwura, fɣen-d di lawan n ttraḍ-nni, am « La passion humaine », tiẓrigin J. Millias-Martin‚ Paris‚ 1956. Gar wiyaḍ-nniḍen, nezmer ad d-nebder « La Cour des Miracles (d amezgun) », tiẓrigin SNED‚ Ldzayer tamanaɣt‚ 1978, « Qui se souvient de Margueritte (chronique) », tiẓrigin ENAL, 1984, « Clair-obscur (d tullisin) », tiẓrigin ENAL 1984, « Le temps des cicatrices », tiẓrigin ENAL Alger 1986 …

Σabdennur Ḥamituc.

Tasnawit n Σebderreḥman Busaεa, Adekkar.

Ass n 02/04/2025.

Isallen i d-wwiɣ da, ufiɣ-ten deg usmel n https://babzman.com/.