Asmekti n wass n tmettant n tmarut-tamedyazt Kaysa Xalifi

Kaysa Xalifi, d yiwet n tmarut i yegzan ddunit akken ilaq, acku tezga nettat yid-s d amennuɣ, dɣa s termit i tekseb Kaysa seg ddunit, taneggarut-a temla-as tisura n tudert yelhan. Ɣas ma yella tuḍen, yerna aṭṭan-is d win i as-yeṛẓan tikli, yessefcel-as iḍarren d yifassen, lameεna ayagi ur tt-yeḥbis ara.

D anemgal, d ayen i as-d-yernan tabɣest d tezmert i wakken ad tesseɣleb ɣef leqriḥ n tiyita s tegzi, d lebɣi i yugaren tilisa bac ad taweḍ ɣer lebɣi n wul-is. Ad d-nesmekti d akken Kaysa, tḥemmel taqbaylit-is, imi xas ma yella ur tt-teɣri ara deg uɣerbaz, lameεna tefka-s akud-is s lekmal, teɣra-tt, tnuda ɣef wid ara tt-iεewnen, deg-sen gma-s Mhenni Xalifi fell-as talwit i as-yefkan afus n tallelt i wakken ad tt-tessin, armi tuɣal tettaru s yis-s.

Ccil Kaysa mačči d tin i teffɣen aṭas, meεna tella d tameɣnast ɣef teqbaylit, s wayen iwumu tezmer, s wawalen-is d tektiwin-is. Ayagi dɣa yettbin-d deg yimagraden-is i d-tura deg Uɣmis n Yimaziɣen s teqbaylit, imi tella d taneɣnast daɣen. Kaysa i aɣ-yeǧǧan 27 n yiseggasen deg tudert-is, tessaweḍ tura deq-s n yidlisen, ama d temedyazt (Amud Kemm Deg-i), tullisin ( Amud Tabṛat ), d ungal (Iḥulfan) i d-yufraren deg temsizzelt Yamina Micakṛa.

Temmut Kaysa Xalifi ass n, 25 yunyu 2018, deg wass n tmettant n unaẓuṛ-nneɣ i tḥemmel aṭaṣ Dda Lwennas. Talwit i yiɣsan-nsen di sin, terna ɣur-s imi cerken-ten tektiwin d umennuɣ ɣef teqbaylit. Dɣa ass n, 25 yunyu 2025, εeddan 7 n  yiseggasen segmi i aɣ-teǧǧa tfekka-s, wama lexyal-is d tayri-s, ad qqimen i lebda.

Di ttiεad-a n 7 n yiseggasen ɣef tmettant-is, ad tt-id-nader s wawal ziḍen imi d ayagi i teẓẓa deg tudert-is. D isekla n yisekkilen i d-yefkan igumma ziḍen n wawalen d yiḍrisen n yidlisen-is.

Seg tama-nniḍen, imeddukkal-is n Facebook, bḍan asmekti n tmettant-is deg teɣṛabin-nsen, i wakken ad as-inin mazal-ikem deg wulawen-nneɣ. Di taggara, nezmer ad d-nini, am Kaysa, am Dda Lwennas, mazal amennuɣ-nsen yettkemmil ɣas ma yella ulac-iten.

K.S