Lazzayer (timenɣiwt n tlawin) : 35 n tlawin i yemmuten, yal yiwet deg-sent d tasfelt…
Seg umenzu n yennayer 2025 ar ass-a, 35 n tlawin i yemmuten, yal yiwet deg-sent d tasfelt n yir argaz neɣ n yir yimetti i yerran tameṭṭut d taɣawsa n tuzzuft kan.
Acḥal d tameṭṭut i yenḍerren tessusem, acḥal d tin i yettwatayen myal ass, neɣ i yettwaḥqaren s tsusmi. Ta tesber i wudem n warraw-is, terra kullec ɣer wul-is, tayeḍ ur tesεi i win umu ara teccetki neɣ s anda ara truḥ. Ma d kra deg-sent nwant belli tiyiti d useḥqer n wergaz ilaq ad asen-sebrent acku akka i d zzwaǧ a yemma.
Ahat ula d tigad yettagaden ufant talwit di tsusmi. Meεna ar melmi? Ar ayweq ad yidir tmeṭṭut ddaw uzaglu n urgaz amesbaṭli ?
Gar tiqsiḍin n tmenɣiwt n tlawin, neddem-d taqsiḍt n M.Raca, imi d nettat i d tasfelt taneggarut gar 35 i d-nuder yakan. Raca i yesεan anagar 28 n yiseggasen, d tayemmat n 4 n warrac, yenɣa-t urgaz-is di tejnant aɣir n Mila.
Γef leḥsab n tnagiwin n wid i tt-iqerben, Raca tella txeddem d taḥeffaft. Argaz-is i tt-yenɣan iger-itt deg uplakar yeǧǧa-tt tettεummu deg yidammen-is.
Tamεayt n Raca d tin yessezɣaben aglim, yessetrawen allen. Lameεna llant taḥkayin-nniḍen n tlawin d isura i nezmer ad d-nexdem fell-asent. S umata timεayin-i sεant yiwet n taggara d lmut timḥettemt.
Ass-a d lawan ad d-nini icaḍ, icaḍ i terwiḥin n tlawin i yuɣalen d taɣawsa n turart gar yifassen n wid ur nesεi ulawen. D lawan ad d-yili usaḍuf ara iḥudden tameṭṭut d yizerfan-is.
