Ayen nnan ɣef ungal ” Tabrat n Tayri ” n Mass Zahir Meksem.
S wungal “Tabrat n Tayri”, Zahir Meksem yesmed tanekraḍt-is taseklant, d tanekraḍt deg ara naf ya ungalen: Tabrat n uẓekka akked Tabrat n yinig.
Tabrat n tayri, d tirget seddaw yiɣed. D ungal yesnuffusen, yettwazedɣen. Yura-t bab-is akken iwata, s tseddi, s taɣect yeẓran s anda tleḥḥu…
Aɣanib n Zahir Meksem yufrar dayen kan. Tutlayt-is tefrez, tecbeḥ, lqayet. Ullis yettaẓ am waman deg targa, ssnen abrid-nsen. Yal tafyirt tedda d wuletma-s, yal awal ires deg umkan-is…
Mi ɣriɣ adlis-a, stummneɣ, ijbed-iyi, yeεǧeb-iyi ayendin, umreɣ, acku, tutlayt-nneɣ, llan yimura i izemren ad tt-refden, ad refden yis-s tasekla tatrart s wudem ihuskin, lqayen, Zahir Meksem d yiwen gar yimura-ya.
Tabrat n Tayri, d aḍris yettḥazen, mi kecmeɣ deg yisebtar-is, amzun selleɣ i waḍu izerrin gar yisekla, ur yekkat mliḥ, maca, yeččur d tadwast, d tudert, d iḥulfan…
D aḍris d-ittalsen ɣef tayri yezdin Γiwan d Tafsut, d tayri yecban azenẓar n yiṭij deg yigenni yemḍullasen. Leḥmala-nsen tlul-d deg yirebbi n tsekla. Sin n yilmeẓyen-a yettidiren deg tmurt n Fransa, d inelmaden deg tesdawit, assaɣ-nsen yebda asmi dukklen akken ad sekren aneskin ɣef wungal ” Ismeskilen neɣ Aɣyul n wureɣ” n umengal amezwaru deg umezruy “Afulay”. Ad d-iniɣ: amaru mačči kan akka i yefren ungal-a n “Afulay”, tasekla da, ur telli ɣas d adikur, tasekla, da, d isirew (matrice). D nettat i yessemlalen sin n yiwudam-a, tefka-yasen tagnit ad mmḥemmalen, ad d-snedfen takatut ɣef tezdel tatut; ula d Imaziɣen ǧǧan-d amur-nsen deg umezruy…
Γiwan d Tafsut, mi myussanen ugar, afen seg temnaḍt n Wat Yimlal i d-frurint twaculin-nsen, At Walsus d Wat Muḥend. Snat n twaculin-a, kkant tilla meqqren gar-asent seg wasmi ttidirent deg tmurt. Γas unagent ɣer Fransa, uwint yid-sent ccḥani, ttar…
Γiwan d Tafsut, d imelsanen, ur d-uwin s yisali n wayen yeḍran zik gar yimezwura-nsen, ur ssinen ttar, ur ssinen taksent, anagar yiwet n tɣawsa i ssnen, d tumast: Tayri…Tayri yifen kra din deg tudert…
Deg tazwara n wullis, tessuter Tafsut i Γiwan ad yazen tabrat i yemma-s, d tabrat yura Γiwan i yemma-s is yekfa uḍris, d tabrat yettuddumen d tayri…
Yal ixf deg wungal s uzwel-is, yal ixf kennaɣ-t s aceqquf n tafat i yessenεaten abrid i umeɣri, yal aceqquf yefka anya yeddren i wullis…
Tabrat n Tayri d ungal yerwasen s asif deg ttazzalen waman kra kra, dacu, ad yeǧǧ dulaqrar ccama lqayen deg win ara t-yeɣren.
Aḍris yura-t Mass: Madjid Boukhelifa
