Asismel n tesnawiyin n Waɣir n Bgayet: tasnawit n Semεun di tqacuct.

Γef leḥsab n yigmaḍ n ukraḍyur amenwaru, gar 67 n tesnawiyin i yellan deg Waɣir n Bgayet, teṭṭef tesnawit n Semεun amḍiq amezwaru s ufmiḍi n usmurres n 86,76%. Deffir-s tusa-d tesnawit n Ayt Dawed Ḥsin n Sedduq deg umḍiq wis sin. Ma yella d amḍiq wis kraḍ teṭṭef-it tesnawit n Umalu.

Ayen yerzan imeḍqan ineggura, d tasnawit n Uḍekkar akked  tin n Yiḥeddaden i d-yusan deg umḍiq wis 66 d wis 67.

Ad d-nesmekti belli, seg tesnawiyin n tama n Ssaḥel, tasnawit n Ḥusin Ayt Ḥmed n At Smaεel tusa-d deg umḍiq wis 13, ḍefrent-tt-id tesnawiyin n Yiderginen akked tin Maεuc Idris n Lberǧ n Mira. Ma d tin n Sumani Meḥmud n Xerraṭa, tusa-d deg umḍiq wis 17.

Aselway n tɣiwant n At Smaεel Mass Sadeq Rebaεi yumer s ugmuḍ n yinelmaden n tesnawit n At Smaεel. Dɣa yesnemmer deg wawal-is, ama d iselmaden, inelmaden, imḍebbren n tesnawit akken ma llan, war ma yettu imawlan ibedden ɣef usmurres-a n warraw-nsen.

Γef leḥsab-is agmuḍ-a d win yelhan, d acu ilaq ad ddakklent tuyat n kra wid i d-nebder yakan akken ad d-awin igmaḍ ifazzen ugar tikkelt-nniḍen.