Ass agraɣlan n tmeṭṭut : issin azal-im, sbedd lqedd-im, ussan akk d ussan-im!

I kemm a tajeǧǧigt mm yiniten, a tigejdit n yixxamen, a tabɣest ttagaden yiεewwiqen, ɣur-m ad am-kellxen ad am-inin tesεiḍ ass d uzzig i kemm.
Ur teddu di lǧerra-nsen, wigi i d-m-yeqqaren deg wass-im zhu tferḥeḍ, cnu tcettḥeḍ acku d tameṭṭut i telliḍ.

Ala, segzu-asen belli kemm d aqerḍas n tayri, d taεessast n tmetti, d tafessast i uεebbi,  d talemmast i ten-irefden akk s tid yelhan s tid n diri. Ini-asen kemm d zzhir yugaren anza, kemm d iseɣ urǧin yenza, kemm d tumert ɣef wudem ɣas ul yezza.

Ɛeyyen-asen belli d leqder i tebɣiḍ, tessriḍ i win ad kem-ifehmen ad am-yili d amεawen, ih win ara am-yinin aql-iyi da ur ttagad ussan, ur txemmim ɣef tid kem-yecqan, aql-iyi da. Ma terẓeḍ nekk ad am-iliɣ d aεekkaz, ma tbeddeḍ ad am-iliɣ d aεessas.
I kečč a baba, a gma, ay argaz-iw, a mmi, mačči d taqerεet n rriḥa i bɣiɣ neɣ d ameqyas n wureɣ ɣef wacu i rɣiɣ. Ḥsu acmummeḥ-ik deg udem-iw yif ssεaya akk n ddunit, awal-ik aẓiḍan irennu-yi deg ussan, aseḥbiber-ik d usteqsi-inek fell-i yessidir-iyi gar yitran. Anef-iyi ad iliɣ d nekk ad idireɣ akken i bɣiɣ, efk-iyi tilelli ssneɣ mliḥ tilisa-inu, ḥemmel-iyi akken lliɣ mačči akken i tebɣiḍ ad iliɣ.
Errem-iyi azal, errem azal i tin yerran azal i kullec ala i yiman-is.

Ih nekk d tameṭṭut, meεna nekk daɣen d azref, nekk d iẓiɣer, am kečč am nekk ulac d acu yemgaraden. Ḥader-iyi akken i tettḥareḍ iman-ik, qader-iyi akken i k-ttqadareɣ, ḥemmel-iyi ugar n wayen i k-ḥemmleɣ. Gzu-yi, rfed-iyi, nadi ɣef wayen ur tessineḍ deg-i. Nekk d tala n yiḥulfan, d tamda n laman i win i yi-ssnen iberdan.

Sɣur : Sabrina Xalifi