Arraz wis kraḍ di tfeska n tmedyezt n Udrar n Fad tewwi-t Massa Lynda Bouseksu, ɣret isefra-ines!
Asefru amezwaru: Isteqsiyen war tirirt
I tteẓda n tlelli selleɣ
Taɣect tcewweq ɣef lebda
Deg tqerrabt, ul-iw seffleɣ
Targit-is yes-k i tebda
Wissen kan ma d-rewleɣ
I lmut tettɛebbi tfekka
Neɣ deg wakal ad weḥleɣ
S nekki s kečč nettfakka ?
Neɣ ma s Rebbi-k qebleɣ
Laxert-iw ad k-ttaf akka
Leḥmala ara k-ḥemmleɣ
Ad aɣ-tesddukel deg uẓekka?
Wissen ma ad d-uɣaleɣ
Ad mɣiɣ deg tudert-a
Neɣ d akal ar d-qqleɣ
Rruḥ urwent-id tikta?
Wissen ma yella dreɣleɣ
Tezziɣ am yiferṭeṭṭa
Neɣ d aḥulfu i sneɣleɣ
Taftilt-is d ṭṭlam i tweṭṭa?
Wissen ma yella ad d-laleɣ
Ad yi-d-rrent Tewkilin
Akken yid-k ad mlaleɣ
Ad d-nessemṭi i Tilin?
Wissen ahat ma meḍleɣ
Tella tudert deffir ta
Neɣ d iman ifetti yesleɣ
Talalit ta teḍfer ta ?
Ɣer yitran mi ttmuquleɣ
Deg uɣebbar-is i si d-nebda
Deg tsusmi n yiḍ smiɛqileɣ
Anwa Rebbi iɣef nebḍa?
Deg leḥruf n wawal-ik feṣṣleɣ
Ḍemɛeɣ ul ad isleb da
Afeɣ-d iman-iw ɣefleɣ
Mi rriɣ udem-ik d lqebla
Ɣef tseǧǧaḍt ma drus i k-nefleɣ
Ma drus i yettru leɛbd-a!
D ddnubat-iw i slaleɣ
Neɣ d alɛeb i nleɛb da ?
S lkas yeččuren ẓulleɣ
Ma iɣab leɛqel-iw wicqa
Di ssekra-w ad k-id-sweṣleɣ
Lewḥec-ik ad as-rreɣ lweɛda
I tteẓda n tlelli selleɣ
Taɣect tcewweq ɣef lebda
Deg tqerrabt, ul-iw seffleɣ
Targit-is yes-k i tebda
Asefru wis sin: Asugen n teswiḥt
Ɣef teswiḥt ideg neqqim
Idis n wa ɣer yidis n wa
Wiss ma swiɣ deg uḥulfu aqdim
Yid-s wa, yid-i iswa?
Neɣ d aḥertut yettleqqim
Deg waṭṭan ur nesεi ddwa..?
A-t-a wudem n lxiq-im
Yemmaren deg-m d tiregwa
A-t-a macahu-nni uṛqim
Yeldi tawwurt i ccfawa
Yemmekta-d wul i neqqim
I nettru ɣer ccmeɛ n txelwa..
Tedda taɣect tekkussem
Ɣef teksumt-iw, tenna d wa
Tacenfirt-iw teggusem
Tettqiṭṭir d ssem d ddwa
D tagrest d uṛɣu, war isem
Tḥebbek isufa d tmiqwa…
Gar-i d nek ma nessusem
Iḥulfan-iw d tazawa
Gar-i d kečč mi yezdem rrsem
Ɣur-i iseɣli-s yulwa
Ma yezdi-aɣ, ɣas yusem
Ḥseb-it uneglus n yigenwan…
Mennaɣ aḍu ad aɣ-yeddem
Ad neskiw imi n tliwa
Tamuɣli-k deg-i ad tudam
Ad mireɣ deg-k, ma nengedwa
Ad s-nesseɣli kan udem
I tmeɣrut-nni n yisefra….
Ur iyi-d-qqar ḥemleɣ-kem
Ad nḥerref tikli i tlisa
Ur iyi-d-qqar bɣiɣ-kem
Iman ad yi-rwel ɣur-k s tuffra
Yif xir ma nessusem
Meqqar ḥedd ur d-yenni kra.
[L1]
Nengedwa: neddukel lwahid
Iseɣli : d amrar tetteqqen tmeṭṭuyt mi ara tbabb tazdemt
Asefru wis kraḍ: Akka i d-tessawel tmeṣnuɛt n Ɛin Fewwara
Hax, awi tibbac-ayi tigeswaḥin
Nekk ttsetḥiɣ yes-sent
Ccbaḥa-nsent d lɛerr
Ccbaḥa-nsent d ccer!
Hax, awi tibbac-ayi timeḥbusin
Ur nessin kra deg tudert
Anagar tikulya
Tilelli-nsent tɛeǧǧer s leḥram
Tɛeǧǧer s ddel d tsulya!
Hax-itent, ur tent-bɣiɣ ara
Deg tfekka-yi yettwamelken
Iɣef ttruɣ yiwen akken n wass
Xaṭer ttɣileɣ-as
D lmelk
N tmeṭṭuyt umi semmaɣ « Nekk » …
Awi iffan-ayi imenɛulen
I d-yettakren tiṭ seg yiri
N teblust-iw yeẓẓayen
S leḥya-nsen d tehjijat-nsen…
Awi iffan-a imcumen
Ferqen s tecmat d idisen
Segmi d-mɣin deg yidmaren-iw
D lɛib igemmu yid-sen…
Hax, awi-ten
Snulfu-yi-d deg-sen kra
Snulfu-d asefru yecbeḥ s lmeḥna
Yecbeḥ s ssensla
Snulfu-d ifyar
Isekkilen-is fesren
Sdat tmuɣli n umedyaz
Werǧin ijerred-iten
Snulfu-yi-d yes-sen irriten
Ad lhun d timucuha
Ggal yessen, err-iten
D lweɛd ur yeḥniten ara
Snulfu-d
Xelq-d deg-sen ayen tufiḍ!
Ad yili d amesnuɛ
Ad t-ddzen wid ijehlen
Neɣ ahat d attelt lxali
Ad ɛerqen deg-sen
Yiɛessasen d Tewkilin
D ayyur iḥeznen!
Ma tebɣiḍ d lemqam
Ssiɣ-as ccmeɛ dɛu-asen
Xelq-d deg-sen kra
yecba lekfer
Yecba tagrawla
Awi tibbac-ayi yettwaqeddsen
Sels-iten i yisbeddaden n Trebbitin
Xaṭer nekk d tuntit ur tent-stahel ara
Ur tent-stahel ara
Ur tent-stahel ara…
