Tukkist seg ungal ” amsebrid ” n Cabḥa Ben Gana

“Ssedhuyeɣ iman-iw deg wass ɣer wass qqareɣ-as ulac ccedda ur tettabaɛ talwit, ccetwa tecba aɛeṭṭar, ad tewwet ad tɛeddi, ad teǧǧ nnuba i tefsut. Ssedhuɣ iman-iw s tmucuha iyi-d-tettawi setti ɣef tullas yedren tudert n yiḍan tagara uɣalent d tigeldunin, ziɣ timucuha d timucuha kan, snulfuyen-tent-id yimdanen am nekkini akken ad ffɣen yis-sent si tmeddurt i yettwaḥetmen fell-asen ad tt-idiren, nutni ur tt-bɣin ara, tunṭict-nni tamerɣant, tarẓagant i ten-id-iṣuḥen.

Dayen xḍiɣ-kent a tirga ! Xḍiɣ-k ay asirem ! Ula d kemm a tabɣest, ur tufiḍ ara txedmeḍ ɣur-i, ur tufiḍ ara xedmeɣ yis-m, ɣas nemseɣ tannumi nekk akk yid-m, neddukul akken, ulac anda i newweḍ, yal tikkelt ansi  i neffeɣ i d-nkeččem ! Tettwafek-ak ttesriḥ ay akud, cerreg anda tt-tufiḍ temlal, gzem-itt anda tt-tuɛiḍ.

Tettwafek-ak ttesriḥ ay akud urar yis-i akken i ak-d-yehwa, aql-i gar yifassen-ik, mi teɛyiḍ di laɛnaya-k serreḥ-iyi, ɣur-k ad d-tuɣaleḍ ɣur-i, nekk ur d-teggra tezmert deg-i s wayes ara d-ssukseɣ iman-iw ger tuccer-ik”.

Sɣur mmi-s n yilel