Tadiwennit akked tmedyazt Melissa Amalou
Aɣmis Isaḥliyen : Ini-d i yimeɣriyen anta i d Milissa Amalu ?
Melissa Amalou : D tilemẓit i d-tefka temnaḍt n Yiɛeẓẓugen, d tanelmadt di tsedawit n Lmulud At Mɛemmer, aḥric n tsekla akked tutlayt Tamaziɣt, di tudert-iw 23 n yiseggasen, d tamedyazt, d tin iḥemmlen ayen i icudden ɣer tsekla tamaziɣt akked tẓuri s umata.
Amek i d-tufiḍ iman-im deg unnar-a n tmedyezt ?
– D acu ara k-iniɣ, ahat d leḥmala i ḥemleɣ ad rreɣ ayen akken iluɣen di tmetti-nneɣ d ccbaḥa s usefru, imi ḥemmleɣ ad d-iniɣ ayen i yi-qerḥen s usefru. Ahat d anect-a i yi-d-ldin tawwurt ɣer umaḍal-a n tmedyezt, akked tira.
Ɣef wacu i tḥemmleḍ ad taruḍ, neɣ d acu-ten yisental i tesmenyifeḍ ?
– Meḥsub ttaruɣ akk ɣef yisental, gar-asen: tayri akked tlelli, timetti akked tmagit, akken daɣ i yuriɣ aṭas n yisefra s yes-sen rriɣ tijmilin i yinaẓuren. Messalay-aɣ-d ciṭ ɣef wammud-inem n tmedyezt ”Agerruj”… – Ammud-a n tmedyezt “Agerruj” d ciṭ kan seg wayen uriɣ, d asurif-inu amezwaru neɣ ɣas ini d asenfar swayes rẓiɣ asalu i tira akked usiẓreg, imi rriɣ-d akk ayen yellan d timawit kan d tira i wakken ur yettruḥu ara. Ammud-a deg-s 33 n yisefra, yesɛa 64 n yisebtar, tazwart yura-tt umedyaz Ferhat Amar Ouchabane akked Rachid Alliche, asuneɣ yella-d sɣur Achir Ilissia. Adlis-a yettmeslay-d ɣef tal taɣawsa icudden ɣer tmetti, deg-s tijmilin d waṭas-nniḍen,… Ad neǧǧ amur i imeɣriyen ad d-afen ayen yeffren daxel n ugerruj.
Amek i tẓerreḍ annar n usiẓreg ?
– Ur yeshil ara maḍi, annar n usiẓreg yewɛer aṭas, imi akken walaɣ nekkini tuget n yimsiẓergen ur xeddmen ara s tayri axeddim-nsen, rnu ɣer waya mačči akken i tebɣiḍ ad txedmeḍ ara ki-d-yessufeɣ adlis-inek.
Tamuɣli n Melissa ɣef tmedyezt ?
– Tamedyezt taqbaylit d tanesbaɣurt, tezger-d i wacḥal n tsutiwin, ass-a ilaq ad nḥareb fell-as, ad tt-nesnerni, imi d agerruj ur nfennu, d agerruj-nneɣ.
Ugar tamedyezt d acu nniḍen i tettaruḍ ?
– Melissa ɣas akken d tamedyazt, maca tettaru ayen-nniḍen am iḍrisen akked tullisin.
D acu d isenfaren i tesɛiḍ ɣer sdat deg uḥric-a n tira ?
– D acu ara k-iniɣ, akka tura lhiɣ-d d wammud-a inu, ttikkiɣ yes-s di tmesriyin n yidlisen, akked temliliyin i d-yettilin ɣef tmedyezt. Ɣer sdat aṭas n yisenfaren ara d yilin, acuɣer ala, ama deg uḥric n tmedyezt, ama d ayen-nniḍen.
Efk-d tamuɣli-inem ɣef tfaskiwin n tmedyazt i d-yettilin sya ɣer da ?
– Tifaskiwin akked temliliyin n tmedyezt sɛant azal meqqren, imi deg-sent i nettisin imura, akked yimedyazen-nniḍen, deg-sent nettajew-d timussniwin, nezmer ad d-nini d tallelt i usnerni n tsekla taqbaylit, akked tutlayt-nneɣ s umata.
Anwaten yimura i tḥemmleḍ ad teɣreḍ ?
– Mačči d yiwen neɣ sin, di tazwara nniɣ-ak yakan dakken ḥemmleɣ akk ayen icudden ɣer tira akked tẓuri, gar yimura zemreɣ ad d-adreɣ : Muḥya, Victor Hugo, war ma ttuɣ amedyaz aqbur Si-Muḥend-Umḥend, ḥemleɣ nezzeh tamedyezt-ines. Lḥaṣul mačči d yiwen (mst).
Awal n taggara swayes ara d-nessali tadiwennit-a
– Skud mazal tazmert, mazal iɣallen, mazal ad iliɣ i lmend n tutlayt-iw taqbaylit, mazal ad d-fkeɣ i tmedyezt, i tira, akked tẓuri s umata. Atas n yisenfaren ara yilin i lebɣi-nwen, di lebɣi n teqbaylit. Tanemmirt ɣef tegnit i yi-tefkam i wakken ad d-mmeslayeɣ cwiṭ ɣef leqdic-inu. Ssarameɣ teɣzi n tudert i uɣmis Isaḥliyen.
Yesteqqsa-tt : Mmi-s n Yilel