(Tavidyut 2). Tuɣalin n Uleḥlu: teffeɣ-d tezlit tis snat

Seld tizlit tamenzut “Ay abaraǧ”i d-yesres di terga-s n Youtube, d iɣef i d-nuwi awal deg umagrad-a, isuffeɣ-d ucennay amḥaddi Uleḥlu tizlit nniḍen s uzwel “Ahya mon ami”, ass-a 14 yebrir.

Dɣa, ur iga tikkelt-a tavidyut i tezlit-a tis snat, ɣef kra n tmentilin (ssebbat). Gar-asent aḥras i t-id-yeḥres wakud, akken i aɣ-d-tenna yiwet n teɣbalut i t-iqerben. Yefren kan ad tt-id-yesres d ameslaw (audio) s yiwet n tugna d ayla-s ɣer deffir, imi agejdan yedda-d.

Ayen nezmer ad d-nwennet ɣef tezlit-a, dakken d izen daɣen ula d nettat i win yellan d amdakkel-is. Yal yiwen dɣa ad yesεu taɣuri d ayla-s ɣef wacu i d-yettmeslay, neɣ ɣef wanwa daɣen.

Rnu ɣer-s, m’ara as-iεiwed yiwen timesliwt, ad yegzu akk awalen, ad yenǧem ad yefhem ugar ɣef wacu i d-tuwi tezlit-a.

Akken i d-tban, txulef mliḥ taɣect-a aɣanib n tmezwarut-nni “Ay abaraǧ”, rnu ur yeɣsib wanya-s.

Tzemrem si tura ad as-teslem i tezlit-a da, neɣ deg terga-s tunsibt n Youtube OULAHLOU officielle imi yelha ma tennezdim (s’abonner) deg-s, di leεḍil ad d-yernu tizlatin nniḍen akken i d-iberreḥ yakan.