ASMEKTI : ANAẒUR BRAHIM BELLALI I AΓ-YEǦǦAN ASS N 19 ΓUCT 2024.
Acennay Brahim Bellali, ilul di Ginzat, di 28 dujamber 1933. Deg useggas n 1953, yunag ɣer Fransa, ad yaf din amahil.
Maca, netta i yezdeɣ ccna d uẓawan, mačči anagar axeddim i t-yecceɣben ; yekcem s annar n tẓuri ; yecna, yedda d waṭas n yinaẓuren imeqqranen, ama n tmurt-nneɣ am Ccrif Xeddam, Kamal Ḥemmadi, Sliman Ԑazem, Ԑellawa Zerruqi, Ṣaleḥ Saεdawi ; ama n tmura-nniḍen : Farid Lεetrac, Muḥemmed Ԑebdelwehab, Ԑebdelḥalim Ḥafeḍ, Aznavour…
Yebda amecwar-is n unaẓur deg useggas n 1959, ladɣa s tikkin-is di ccna s tiɣect kan (tallilt), di yiwet n terkeft taqbaylit di Radyu Tafransist, yesselḥuy-itt unaẓur ameqqran Ccrif Xeddam. Bellali, yesker daɣen tidwilin lwaḥid Farid Ԑli, Muḥemmed Meǧahed, akked wiyeḍ.
Gar tezlatin-is tmezwura, llant tid-nni i d-yeffɣen deg useggas n 1960, « Ruḥ ay itri » akked « Lemɣiba ». Asentel-nsent, ɣef lɣerba, lxiq n uɣrib ɣef tmurt-is d twacult-is.
Deg useggas 2014, yessufeɣ-d adebṣi, gar tezlatin i yellan deg-s : « It Yaεla merra nḥafen », « Tiɣremt aman-is lhan », d tezlit « A wi iẓuren It Yaεla » ideg yerra tajmilt i yimeɣrasen n temnaḍt n Ginzat.
Deg wayen yerzan tagrawla n Lezzayer, tawuri n Brahim Bellali meqqeret di Tfidiralt n Yizzayriyen di Fransa, s idis n watmaten-is ; aṭas n yimeɣnasen d yiqerra n Ginzat i yellan di Tfidiralt-a, gar-asen : Rabiε Rabya, Muḥemmed Γafir…
Amedyaz yellan deg yinig, akkin i yilel, yessarem aṭas ad yerzu ɣer tmurt, ad iwali liḥala-s, akked ccwami i d-yeǧǧa umharsan arumi. Degmi yecna di yiwet n tezlit :
A wi iẓuren At Yaεla
Idurar tuddar sswaḥel-is
Ad iεeddi ɣef Tilla
Ad iẓer ma yeḥla lǧerḥ-is…
Brahim Bellali, yessufeɣ-d ugar n 60 n tezlatin ɣef yisental yemgaraden : amezruy, tayri, ddunit, timetti, atg. Yettwassen s waṭas n tuɣac : Ccah seg-i, Asmi lliɣ rebḥeɣ, Jemmεeɣ-ten frank frank, Temẓi-w, Ad ruḥeɣ, atg. Ur nettettu tizlit « Ginzat n It Yaεla » ideg d-yeqqar :
Genzet n It Yaεla, telha ɣur-k zziyara
Kulci-k tura yelha, cerhen wulawen merra.
It Ḥafeḍ d ljiran-ik, leεbad-is merra lhan
Ilmayen i gemmad-ik, deg udrar n Uẓru Yeflan
It Waretiran d rruḥ-ik, mechuren mkul amkan.
Idurar-ik εlayit, zzin-d fell-ak am ṣṣur
Lqima-nsen ɣlayit, kulci-nsen yebna inur
Qwan dinna lemqamat, a wi istufan ad ten-iẓur !
Niɣ daɣen tizlit ideg yerra tajmilt i tlawin tiqbayliyin :
Sslam ɣef Teqbayliyin, mi d-ffɣent am tsekrin
S umendil n tesfifin.
Yessi-s n yidurar-nneɣ, lḥerma rnant nnif
Di tudrin ttraǧunt-aɣ, ɣas akken ṣebrent i lḥif
Yessi-s n tmurt εzizen, win ḥemmlent seg wul dayen.
Brahim Bellali yeǧǧa-aɣ ass n 19 ɣuct 2024, maca, netta yellan d anaẓur, acennay-amedyaz, d ameɣnas n tlelli, yeǧǧa-d amecwar n yiseɣ, d ugerruj n uẓawan d yimeslayen ara yessawalen dima di tmurt n Leqbayel s umata, d temnaḍt n Ginzat n It Yaεla.
[Agzul seg Tudert n Brahim Bellali « Adlis Ginzat, Amezruy Iles d Yidles », N. Medjdoub akked I. Seffar), Tiẓrigin Boussekine (Bgayet).]
