Tadiwennit akked umedyaz-imsuffeɣ Xerzi Ɛebdesseḥ << segmi lliɣ d ameẓyan ḥemmleɣ isura d usisleg, dɣa ..... >>

1)Aɣmis Isaḥliyen: di tazwara sissen-d i yimeɣriyen-nneɣ d menhu i d Xerzi Abdesseḥ?

Xerzi Ɛebdesseḥ: Xerzi Ɛabdessaḥ d ilemẓi yesεan 19 n yiseggasen di leεmer-is, ttaruɣ tamedyazt rennuɣ xeddmeɣ deg usisleg neɣ tasuqqilt n yisura.

2)Amek i ak-d-tusa tekti n usuffeɣ d usuqel n yisura ɣer teqbaylit?

seg asmi lliɣ d ameẓyan ḥemmleɣ isura d usisleg dɣa mi wḍeɣ 14 n iseggasen i d-xedmeɣ asenfar amenzu umi nsemma ” Amezruy n tmurt ”, d baba i d anemhal anaẓuran n usisleg ma d nekk ṭfeɣ deg tuṭfa n ṣṣut d uqeɛɛed n tugna, maca xas nexdem-it ur d-yeffiɣ ara usaru-nni armi i d-xedmeɣ tiɣerɣert n web asekles.

3)Ahat d leqdic yessran i ddeqs n ttawilat akked wakud?

deg tama n ttawilat nxeddem xas s drus, dɣa asaru amenzu s ttawil n usawal ( téléphone ) akked uselkim kan i t-nexdem, ma seg tama n wakud nleḥḥu kan akken nezmer leḥsab n wakud i nesɛa.

4)D acu-ten wuguren i d-tmugreḍ ar tura?

uguren llan deg ttawilat, llan deg tlelli n uzuzzer n usaru, imi ur yezmir ad d-iɛeddi di tiliẓri (télévision) ma ur d-wwiɣ ttesriḥ ɣer bab usaru, d ayen yellan mazal ar tura.

5) Ahat ula d agerdas-is di tsenselkimt iεawen-ik  ugar deg leqdic-a?

tasenselkimt d ayen i d-lemdeɣ weḥdi deg uxxam syin snerniɣ deg wammas n usileɣ amsadur akken ad yi-d-fken agerdas.

6) nwala belli ɣas ulamma  tura i tebdiḍ leqdic-ik , meεna yehwa i ddeqs n yemḍafaren, ahat imi tqeddceḍ seg ul-ik?

zemreɣ ad d-iniɣ seg ul d wafud i d-yettasen seg yimḍafaren xas akka mazal ttwaliɣ deg-i kra ixus maca kra yellan seg ul yettaweḍ ar wull

7) Ula d leqdic-ik yekka deg usnerni n tutlayt, ladɣa imi tesseqdaceḍ taqbaylit tatrart. Mmeslay-aɣ-d ugar ɣef uheggi-inek d wid i k-yettεawanen? Neɣ s unamek wayeḍ, ssider-aɣ cwiṭ yid-k taswiεt n uheggi-k?

Yal tikkelt mi ara d-xedmeɣ kra ttaɛraḍeɣ ad d-rnuɣ awal atrar ur nelli yakan ama di tsenselkimt ama deg usisleg ( doublage), wid i yi-ttɛawanen yella baba ” Xerzi Ɛabdelqader ” akked gma amecṭuḥ ” Xerzi Amaziɣ ”

8) Awal ɣur-k ma yella wacu tebɣiḍ ad d-ternuḍ, neɣ nettu kra ur d-nemmeslay fell-as?

zemreɣ ad d-iniɣ tanemmirt i uɣmis isaḥliyen ɣef tadiwennit-a, am akken ad ssawḍeɣ tanemmirt  seg ul i wid akk i yi-ssebɣasen, ad asen-iniɣ tanemmirt.