Arraz amezwaru di tafaska n tmedyezt n Udrar n Fad yewwi-t Mass Mebarek Gamar, ɣret isefra-ines !

Myal imekki di tfaska n tmedyezt n Udrar n Fad i d-tettheggi tdukkla tadelsant Adrar n Fad, yewwi-d fell-as ad asen-yazen kraḍ n yisefra. Ha-ten-aya yisefra n Mass Mebarek Gamar i yewwin arraz amezwaru.

1- TAREBBIT N UCQIRREW

Yis-s i ireffed tadist wallaɣ

Ittaččar-d dduḥ d tiftilin

Ɣef tebrek temlel mi tessaɣ

Iteqqel-as-d unamek i tillin

I wat tmuɣli yedreɣlen

D nettat

I d tafat

Yettaken tiṭ i wallen.

Sdat-s ugur yettleɣẓam

Ur yezmir ad yezdi lqedd

Am win ur nečči, yuẓam

Tikli-ines s weḥrured

Anda teẓmek ɣef yiri

D tagmert

Mm tezmert

Yettcerrigen tiniri.

Tezga deg yijufar n wakud

Am ureqqas n ssaɛa

S itran tessalay agdud

I yegzan azal tesɛa

D tamnayt deg yimennuɣen

D irebbi

N at Rebbi

I d-yettrebbin allaɣen.

Tessen ad tadef ɣer tuffra

Tessefruy-d tiqnuẓin

Awal-is n taggara

Uguren sdat-s ttimẓin

Tessifsus taɛkemt n lmertat

D laman

Neɣ d aman

Issismiḍen urɣu n nnehtat.

Ttruẓen yifadden i uwezɣi

Mi ara d-tecrured s annar

Targit tettmagar lebɣi

Ittebdad-as-d ɣef umnar

D tarebbit n ucqirrew

Ayen d-ibedden

Nnig-s ad d-yedden

Merriɣet tidi ad tt-yecrew

D tamḥaddit anda tella

Di tyersi n tkerkas d tiẓẓit

Tessifrir-d sufella

Tidet, nnig waman d zzit

S tewzel i tferru tirwas

D tafrara

Ittagin tuffra

Mi d-tfuǧǧ ad yali wass.

D aḍu-s i iferrun tilufa

Mi d-isuḍ tṛad issusem

Yesduqqus-d di tnafa

Tayaziḍt n at belqasem

Anda qqaren humm u ɣumm

D tiɣri-nni

Mi ara d-tini

Ha-t-a llqeḍ, ha-t-a uqamum.

Teqqel-as d aɣvalu i winna

Temmar ɣer temda-s teččur

Yesselqef, fad-is yefna

Tetteffi-d nnig-s d acercuṛ

Ɣer ṣṣaba lewhi wwint

Tayri-nni-nsen tennerna

Dɣa yerna-d fell-as takna

D tis snat di tfekka n tmacint.

2- CCNAWI N TUDERT

Anda akken yesrugmut yillel

Melmi ara yeclex yimi

S zzhir n lemwaji icewwel

Yeslaley-d tsunami

Ḥemmleɣ tizlit n leɛqel

Mi ara tt-id-tecnu tsusmi

Din awal mi ara ijeffel

Ṣrima ad t-terr d agugam

S udeqqem ad t-ireẓ uleggam

Anda akken yettrebbi tayet

Lekdeb yesseɣzef asaru

Yurez tifrat di tcerket

Akken ad tessur ur tferru

Ḥemmleɣ tizlit n tidet

Mi ara tt-id-yecnu usefru

Lbaḍna ittruẓ-as tiferret

Winna umi qqaren amedyaz

Yuklalen isem n umeyyaz

Anda akken awal ur yelli

Deffir tekmamt yettwaḥbes

Ur yezmir ad d-yeḥlelli

Yeqber kan yečča times

Ḥemmleɣ tizlit n tlelli

Mi ara tt-id-yecnu yiles

Timenna ad d-tessenfali

Tid ixemten deg wulawen

Ad tent-id-tsemmi s yismawen

Anda akken tetti bennegni

Tebberwi ur d-iban yixef-is

Tettqeggil din tguni

Deg wallaɣ issaɣ ugris

Ḥemmleɣ tizlit n tmussni

Mi ara tt-id-yecnu udlis

Dinna amɣar azemni

Itemmel-d tidak yerwin

Akked ubrid yettawin

Anda akken afud-is yeɣli

Iseɣ iǧǧa adeg i tecmat

Asḥissef ittarra tili

Itezzu tasa n tyemmat

Ḥemmleɣ tizlit n tddukli

Mi ara tt-id tecnu tegmat

Cceḥna ad tettu iḍelli

Nnif ur iqebbel atmaten

Ad yeḥḍer ad ttewwten

Anda akken texsef tziri

Tallast tekkes-as izerfan

Berrik, yeddumbes lemri

Tellufḍa tugna-s yeṣfan

Ḥemmleɣ tizlit n tayri

Mi ara tt-id-cnun iḥulfan

Tettawi-d yid-s abeḥri

D-issakayen aḍu n tumert

Yettaken anamek i tudert

Anda akken teqqur tasa

Ur mḥennacent tsudan

Ddɣel yurew-d talafsa

Leḥmala gezren-tt yiḍan

Ḥemmleɣ tizlit n talsa

Mi ara tt-id-yecnu umdan

Din yecreh wudem n tmelsa

Tifidi teqqel-as tejbirt

Tumer, tecmumeḥ tetbirt

Anda akken ddren lmeyytin

Yugin ccḍeḥ di tmeɣra

S lekfen cebbḥent teslatin

Ddrent tudert n tmara

Tɣunzuɣ merra tizlatin

I tugi ad d-tecnu snitra

D-issawaḍen tibṛatin

I d-ttarun wat nnger

Tt-yesnegren send ad tenger

Anda akken, andakken

D wanda akken

3- TIMSUNIN N TUDERT

Taseftit mi d-tessefti

Amyag n tudert d mut

I tuccḍa-s tugi aseɣti

Teɣli-d tadist i tefsut

Tessuṭuḍ-aɣ s nnhati

Deg yirebbi-ines nesrugmut

A nekk effeɣ deg usmekti

Ttḍilli-d deffir tatut

Ad nedder din am tikti

Yeffer unaẓur di teklut.

***

Neggurreɛ-d asefti n yizri

Yerẓan amyag s wallus

Yessen kan yiwet n tɣuri

Anda yettafeg i yettrus

Yeqbel yedder d imɣerri

Yezzer di lɣerba n uɣurru-s

A nekk ssaki-d w’ ur neẓri

Tidderwect ad s-teṭṭef afus

Imal ad s-d-iger tiɣri

S tẓuri uṭun wis semmus.

***

Amyag di tseftit yegnen

I uẓar-is tegzem tara

Yegra-d d asuf, d ayiwen

Ḥanun zanun di tuffra

Yekkaw, la iswi, la izen

Tallast-is war tafrara

A nekk ssemsed-d isekkilen

S yimru nǧer-d lǧerra

Ad ten-id-tesɛu d akniwen

Tadist mi tt-terfed tira.

***

Deg usefti teǧǧa tayet

Yettwarez umyag di tmara

Yekref, yerreẓ di tferret

Yexcawet, ur d-tegri lkerra

Gar tuɣmas teḥṣel tidet

Teggugem ur d-tenni kra

A nekk berz-d taqaɛet

Heyyi-d inzizen i tmeɣra

Ad terwu azwu turet

S tunṭiqin n snitra.

***

Di tseftit n usṭeglelli

Yerran amyag d aɛeggun

D inekraf deg yiḍelli

Ccix-nneɣ d amanun

Yesselmad-aɣ derɣali

Nẓer tacḍaḍt d aqelmun

A nekk ɛiwed-d tamuɣli

Slal-d allaɣ ara tt-yefrun

Taluft n wamek nzant wulli

Ad tt-id-nurar d amezgun.

***

Yeẓẓel kan di zik-nni

Yedderɣel ur yeẓri tigert

Yegres yugi ad yennerni

Am yilem deffir ticert

Gar yiniten ur yesɛi ini

Gar wid yeddren d alaxert

Ekker a kečč d nekkini

Amyag ad s-d-nerr tazmert

Ad t-nesseftay s tmussni

Di temsunin n tudert.

***